गोदामाअभावी मका खरेदी बंद 

चंद्रपूर ः गोंड पिंपरी तालुक्यातील भंगाराम तळोधी येथे सुरू करण्यात आलेले मका खरेदी केंद्र महिनाभरातच बंद करण्याची वेळ आल्याने शेतकऱ्यांमध्ये रोष निर्माण झाला आहे. येथील खरेदी पूर्ववत व्हावी याकरिता गोदामातील मालाची उचल करावी, अशी मागणी बाजार समिती संचालक विनोद नागापुरे यांनी केली आहे.  गोंड पिंपरी परिसरात लागवड क्षेत्र वाढीस लागल्याने उत्पादित मक्याची हमीभावाने खरेदीची मागणी होऊ लागली. त्याची दखल घेत प्रशासनाकडून भंगाराम तळोधी येथे हमीभाव केंद्र सुरू करण्यात आले. या परिसरातील २० ते २५ गावातील शेतकऱ्यांनी या निर्णयाचे स्वागत केले. परंतु केंद्र सुरू होऊन महिनाभराचा कालावधीदेखील झाला नसताना हे केंद्र बंद करण्याची नामुष्की प्रशासनावर ओढविली आहे. मका साठवणुकीसाठी असलेले गोदाम भरल्याने हा निर्णय घ्यावा लागला.  विशेष म्हणजे गोदामाची व्यवस्था करण्यात यावी किंवा असलेल्या गोदामातील मालाची उचल करावी, अशी मागणी दहा दिवसांपूर्वीच जिल्हाधिकाऱ्यांकडे करण्यात आली होती. मात्र त्यानंतरही कोणत्याच प्रकारच्या हालचाली न झाल्याने खरेदी केंद्र अखेरीस बंद झाले. यामुळे शेतकऱ्यांची चिंता वाढीस लागली आहे. परिसरातील अनेक शेतकरी मका विकायच्या प्रतीक्षेत आहेत. परंतु जोपर्यंत गोदामातील मालाची उचल होत नाही तोवर नव्याने मका खरेदी न करण्याचा निर्णय संबंधित विभागाने घेतला आहे.  दरम्यान, मका खरेदीला शासनाने शुक्रवार (ता. १७) पर्यंत मुदतवाढ दिली आहे. परंतु या मुदतवाढीचा फायदा शेतकऱ्यांना होणार किंवा नाही याबाबत साशंकता व्यक्त केली जात आहे. प्रशासनाने याची दखल घेत तत्काळ गोदामातील मालाची उचल करावी, अशी मागणी विनोद नागपुरे यांच्यासह शेतकऱ्यांनी केली आहे.