मालावी देशातील हापूस पुण्यात दाखल

पुणे ः दक्षिण अफ्रिका खंडातील मालावी देशातील हापूस आंबा मुंबईनंतर आता पुण्यात दाखल झाला आहे. या वेळी मालावी हापूसला १८०० ते २००० रुपये प्रतिडझन असा दर मिळाला असून, या आंब्याचा हंगाम आॅक्टोबर ते डिसेंबर हे तीन महिने असल्याचे ज्येष्ठ अडते नाथसाहेब खैरे यांनी सांगितले.

एका खासगी उद्योगाने २०१२ मध्ये दापोली येथून हापूस आंब्याची मातृरोपे नेऊन मालावी येथे सुमारे ७०० हेक्टरवर कलमांची अतिघन पद्धतीने लागवड केली. यानंतर २०१६ मध्ये आंब्याचे उत्पादन सुरू झाल्यानंतर थोड्या प्रमाणावर आंबा भारतात निर्यात करण्यात आला होता. यानंतर सलग दोन वर्षे मालावी येथून भारतात आंबा निर्यात होत असून, यंदाची निर्यात गेल्या १५ दिवसांपासून सुरू झाली आहे. विशेषतः प्रक्रिया उद्योगासाठी आंब्याची लागवड करण्यात आली असून, काही प्रमाणात आंबा युरोप, आखाती देशांसह भारतात पाठविला जातो, अशी माहिती आयातदार निरंजन शर्मा यांनी दिली.

एक डझनच्या बॉक्समध्ये या आंब्याची आवक मुंबई बाजार समितीमधील व्यापारी संजय पानसरे व पुणे बाजार समितीमधील नाथसाहेब खैरे यांच्याकडे झाली. यंदा १० हजार डझन आंबा विक्रीचे उद्दिष्ट ठेवले होते. मात्र कस्टमच्या काही तांत्रिक अडचणींमुळे आंबा येण्यास उशीर झाला. यामुळे यंदा केवळ ५ हजार डझन आंबा विक्री शक्य असल्याचे खैरे यांनी सांगितले.

मालावी हापूसचा आकार कोकण हापूस सारखाच असून, रंग आणि चवदेखील सारखीच असल्याने ग्राहकांच्या पसंतीस उतरला आहे. मात्र दर थोडे जास्त असल्याने विशिष्ट ग्राहकच या आंब्याला आहे. आॅक्टोबरमध्ये आंबा उपलब्ध असल्याचे ग्राहकांपर्यंत पोचल्यास या आंब्याची मोठी बाजारपेठ निर्माण होऊ शकेल, असेही खैरे यांनी सांगितले.