शेतीपूरक व्यवसायातून वर्षभर उत्पन्नाची व्यवस्था करा ः जानकर

नांदेड  ः एकात्मिक शेती पद्धती अंतर्गत दुग्धव्यवसाय, कुक्कुटपालन, मत्स्यव्यवसाय यांची एकत्रित जोड करून वर्षभर रोजगार तसेच उत्पन्न मिळेल, अशी व्यवस्था गाव पातळीवर करावी. शेतकऱ्यांनी किमान २० गुंठे क्षेत्रावर चारा लागवड करून उत्पादित चाऱ्याची जिल्ह्याची गरज भागवून इतर टंचाईग्रस्त भागास चारापुरवठा करावा. तसेच राष्ट्रीय दुग्ध विकास प्रकल्पांतर्गत समाविष्ट जिल्ह्यातील पाच तालुक्यांना वगळून इतर तालुक्यांना जिल्हा नियोजन समितीकडून मदत करावी, अशा सूचना पशुसंवर्धन, दुग्धव्यवसाय, मत्स्यव्यवसाय विकासमंत्री महादेव जानकर यांनी केल्या.

जिल्ह्यातील दुष्काळग्रस्त गावांच्या भेटीच्या अनुषंगाने पशुसंवर्धन मंत्री श्री. जानकर यांचे अध्यक्षतेखाली जिल्हाधिकारी यांचे दालनात बैठक घेण्यात आली. या वेळी ते बोलत होते.

या वेळी आमदार सुभाष साबणे, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक काकडे, जिल्हा परिषद सदस्या डॉ. मिनल पाटील-खतगावकर, निवासी उपजिल्हाधिकारी संतोष वेणीकर, अतिरिक्त मुख्य कार्यकारी अधिकारी डॉ. शरद कुलकर्णी, जिल्हा अधीक्षक कृषी अधिकारी रविशंकर चलवदे, जिल्हा उपनिबंधक पी. आर. फडणीस, पशुसंवर्धन उपायुक्त डॉ. रत्नपारखे, जिल्हा पशुसंवर्धन अधिकारी डॉ. शिवाजी पवार, जिल्हा दुग्धव्यवसाय अधिकारी श्री. डोईफोडे, जिल्हा कृषी अधिकारी संतोष नादरे यांची प्रमुख उपस्थिती होती.   

श्री. जानकर म्हणाले, टंचाईग्रस्त भागात कायमस्वरूपी उपाय योजनांसाठी राज्य शासन प्रयत्नशील असून त्यासाठी निधी कमी पडू दिला जाणार नाही. या वेळी जिल्ह्यातील विविध विषयांवर चर्चा करून उपयुक्त सूचना देण्यात आल्या.