कोकणातील आंबा अडकला धुक्याच्‍या फेऱ्यात

वेंगुर्ले, जि. सिंधुदुर्ग : ऐन हंगामातच कोकणातील अनेक भागांत पडणारे धुके आंबा उत्पादकांची डोकेदुखी वाढवणारे ठरत आहे. धुक्यात सातत्य राहिल्यास वाढीच्या अवस्थेत असलेल्या आंब्याला फटका बसण्याची शक्यता आहे.  उत्पादकांनी दिलेल्या माहितीनुसार, यंदा कोकणात थंडी मोठ्या प्रमाणात होती. यामुळे अनेक ठिकाणी मोहोर येण्याच्या वेळापत्रकात काहीसा बदल झाला. पहिला नोव्हेंबरमध्ये दुसरा जानेवारीत तर तिसरा फेब्रुवारीत आला. पण, जानेवारीत थंडीचे प्रमाण जास्त राहिल्याने मोहोर जळून गेला. पहिल्या टप्‍प्यातील आंबा आता हळूहळू बाजारात दाखल होत आहे. पण हा टप्पा कमी उत्पादनाचा असल्याने अनेकांचे नियोजन एप्रिल, मे मध्ये येणाऱ्या आंब्यावरच असते. सध्या पुढील दोन महिन्यांत येणारा आंबा तयार होत आहे. तज्ज्ञांनी दिलेल्या माहितीनुसार जे आंबे तयार होत आहेत त्यांच्यावर धुक्यामुळे पाण्याचे थेंब जमा होऊन त्यावर डाग येण्याची शक्यता आहे. याचबरोबर रोगांची ही शक्यता असते. कोकणातील काही भागात दररोज एका ठिकाणी धुके अशी परिस्थिती आहे. काही प्रमाणात थंडी ही जाणवत आहे. या बदलत्या परिस्थितीमुळे आंबा बागायतदार मात्र चिंतेत असल्याचे चित्र आहे. सध्या अनेक बागांमध्ये लहान लहान आंबे तयार होत आहेत.  पण धुक्यामुळे छोटे असणारे आंबे गळून पडण्याची शक्यता निर्माण झाल्याने आता वातावरण बदलाचा सामना कसा करायचा या विचारात सध्या कोकणातील बागायतदार आहेत. जर अशीच परिस्थिती निर्माण झाली तर मुख्य हंगामातच आंब्याचे उत्पादन घटण्याची भीती निर्माण झाली आहे.  

प्रतिक्रिया हवामानामध्ये बदल होत असल्याने आंब्यावर भुरी व अन्य रोगांचा प्रादुर्भाव होण्याची शक्यता आहे. उत्पादकांनी तातडीने याबाबत कृषी विभाग किंवा विद्यापीठातील शास्त्रज्ञांशी संपर्क करून प्रतिबंधात्मक उपाय करण्याबाबत प्रयत्न करावेत. - विकास पाटील, विभागीय कृषी सहसंचालक, ठाणे, कोकण विभाग

धुके पडल्याने आम्हाला यंदाच्या हंगामात येणारा आंबा वाचवण्याचे आव्हान आहे. एकदम सकाळी गडद धुके पडत असल्याने आम्हाला आता नुकसान टाळण्यासाठी मेहनत घ्यावी लागणार आहे. - उदय गावडे, आंबा उत्पादक