सिंधुदुर्गच्या पूर्व पट्ट्यात आंब्याला मोहरच नाही

सिंधुदुर्ग: फेब्रुवारी महिना संपत आला तरी जिल्ह्याच्या पूर्व पट्ट्यात अजूनही आंब्याला मोहर आलेला नाही. यानंतर मोहर आला तरी आंबा मे अखेर किंवा जूनमध्ये तयार होईल. त्यामुळे त्याचा काहीही उपयोग होणार नसल्याने बागायतदारांमध्ये चिंतेचे वातावरण आहे. क्यार वादळामुळे लांबलेला पाऊस आणि हवामानात होणारा सतत बदल यामुळे यावर्षीचा आंबा हंगाम लांबणार पडणार हे यापूर्वीच निश्‍चित झाले होते. तरीदेखील नोव्हेंबर, डिसेंबरमध्ये मोहोरणारा आंबा जानेवारीच्या पहिल्या आठवड्यात मोहरेल अशी अपेक्षा आंबा बागायतदारांना होती. परंतु, फेब्रुवारी संपत आला तरी जिल्ह्याच्या अनेक भागात आंब्यांना मोहोर आलेला नाही.  जिल्ह्यातील मालवण, वेंगुर्ला, देवगड, सांवतवाडी आणि कुडाळ तालुक्याच्या पश्‍चिमेकडील भागात आंब्याला काही प्रमाणात मोहर आला आहे. काही ठिकाणी फळधारणादेखील झाली आहे. परंतु, जिल्ह्यातील कणकवली, कुडाळचा पूर्वभाग, वैभववाडी या पूर्व पट्ट्यातील तालुक्यांमध्ये अद्याप आंब्याना मोहर फुटलेला नाही. त्यामुळे यानतंर जरी आंब्याना मोहर आला तरी आंबा तयार व्हायला मे अखेर किंवा जून उजाडेल, त्यामुळे त्याचा काहीही उपयोग होणार नसल्याने आंबा बागायतदारांमध्ये चिंतेचे वातावरण आहे.  मोहराविषयी अनिश्‍चितता जिल्ह्याच्या पश्‍चिम भागाप्रमाणे पूर्व पट्ट्यातदेखील मोठ्या प्रमाणात आंबा आहे. किनारपट्टी तालुक्यातील आंबा हंगाम मध्यावर असताना पूर्व पट्ट्यातील आंबा हंगाम सुरू होतो. मुंबईकर मे महिन्याच्या सुट्टीवर येत असलेल्या कालावधीत हा आंबा तयार होत असल्यामुळे या आंब्याला स्थानिक पातळीवरच बाजारपेठ उपलब्ध होते. परंतु, यावर्षी अजूनही मोहोर न आल्यामुळे आंब्याला मोहर येणार की नाही, असा प्रश्‍न बागायतदारांना पडला आहे. प्रतिक्रिया या वर्षी आंबा हंगाम काही प्रमाणात उशिराने आहे. आंब्याला मोहर येण्यासाठी आवश्‍यक ताण झाडाला बसणे आवश्‍यक असते. त्यानुसार किनारपट्टी भागात आंब्याना मोहर आला आहे. परंतु, सह्याद्रीपट्ट्यात नेमका मोहर का आला नाही, याबाबत ॲग्रो मेट्रॉलॉजिस्ट आणि हॉर्टिककल्चर विभागांकडून माहिती घेतल्याशिवाय अचूक निदान करता येणार नाही. त्यासंदर्भात लवकरच माहिती घेतली जाईल. — डॉ. बी.एम. सावंत, संचालक, फळसंशोधन केंद्र, वेंगुर्ला