अर्जेंटिनाला होणार आंबा निर्यात

पुणे : कोकणातील हापूस आणि मराठवाड्यातील केशर आंब्याच्या अर्जेंटिनाच्या निर्यातीचा मार्ग मोकळा झाला आहे. या संदर्भात सुरू असलेल्या प्रयत्नांना यश आले असून, एप्रिल-मे महिन्यामध्ये पहिली कन्साईन्मेंट पाठविणार असल्याची माहिती राज्य कृषी पणन मंडळाचे कार्यकारी संचालक सुनील पवार यांनी `ॲग्रोवन`ला दिली. 

याबाबत पवार म्हणाले, ‘‘राज्यातील फळ भाजीपाल्याला जागतिक बाजारपेठ मिळावी, यासाठी पणन मंडळ सातत्याने प्रयत्नशील आहे. यासाठी कृषी हवामान विभागनिहाय विविध जिल्‍ह्यांमध्ये निर्यात सुविधा केंद्रे उभारण्यात आली आहे. या माध्यमातून विविध फळे भाजीपाला विविध देशांमध्ये निर्यात केला जात आहे. आगामी हापूस आंब्याच्या हंगामासाठी निर्यातीची प्रक्रिया सुरू झाली असून, यंदा अर्जेंटिना या देशात निर्यात करण्यात येणार आहे.’’ 

‘‘गेल्या वर्षी मुंबईमध्ये अर्जेंटिना दूतावासाने आयोजित झालेल्या आंतरराष्ट्रीय व्यवसाय परिषदेमध्ये अर्जेंटिनाच्या राष्ट्राध्यक्षांसह ४० आयातदार सहभागी झाले होते. या वेळी या आयातदारांना महाराष्ट्रातील फळे भाजीपाल्यांबाबत सादरीकरणासह निर्यात सुविधा केंद्रांची माहिती देण्यात आली होती. यानुसार यंदाच्या हापूस आणि केशर आंब्याच्या निर्यातीसाठीची प्रक्रिया सुरू झाली आहे. अर्जेंटिना सरकारने विकीकरण सुविधेची मागणी केली असून, ती सुविधा वाशी येथे असल्यामुळे या हंगामात पहिली कन्साईनमेंट पाठवली जाईल,’’ असे पवार यांनी सांगितले.