खानदेशातील अनेक सिंचन प्रकल्प भरले

खानदेशातील अनेक सिंचन प्रकल्प भरले
खानदेशातील अनेक सिंचन प्रकल्प भरले

जळगाव ः खानदेशातील अवर्षणप्रवण भागातील काही प्रकल्प यंदा अनेक वर्षांनंतर १०० टक्के भरले आहेत. जळगाव जिल्ह्यातील हतनूर, गिरणा, बोरी, मंगरूळ, गारबर्डी, गूळ, मोर आदी प्रकल्पांमधून विसर्ग सुरू आहे. प्रकल्प भरल्याने रब्बी हंगामाबाबत शेतकऱ्यांच्या आशा पल्लवीत झाल्या आहेत. 

रब्बी हंगामाची मदार जळगाव जिल्ह्यात गिरणा, वाघूर व हतनूर या मोठ्या प्रकल्पांवर आहे. सुमारे सव्वा लाख हेक्‍टर क्षेत्राला या प्रकल्पांच्या माध्यमातून रब्बीसाठी पाणी मिळते. यातील गिरणा व हतनूर प्रकल्पात १०० टक्के साठा असणार आहे. तर वाघूर प्रकल्पदेखील ८४ टक्‍क्‍यांवर भरला असून, त्यातही १०० टक्के जलसाठा निर्माण होण्याची अपेक्षा आहे. 

धुळे जिल्ह्यात अनेर प्रकल्प दरवर्षी १०० टक्के भरतो. हा प्रकल्प यंदाही भरला असून, त्यातून विसर्ग सुरू आहे. पांझरा प्रकल्पातूनही विसर्ग सुरू असून, या दोन्ही प्रकल्पांमधून रब्बीसाठी पाणी मिळणार आहे. नंदुरबार जिल्ह्यात रंगावली, दरा, सुसरी व शिवन प्रकल्पदेखील १०० टक्के भरले आहेत. यामुळे टंचाईस्थिती निर्माण होणार नसल्याचे चित्र या भागात आहे. धुळे जिल्ह्यातील मालनगाव, बुराई, करवंद व अमरावती हे प्रकल्प अनेक वर्षांनंतर ओव्हरफ्लो झाले आहेत. जळगाव जिल्ह्यातील बोरी, हिवरा हे प्रकल्पदेखील अनेक वर्षांनंतर १०० टक्के भरले आहेत. तर अंजनी, बहुळा या प्रकल्पांतही चांगला जलसाठा निर्माण झाला आहे. सध्या बोरी, हिवरा प्रकल्पातून विसर्ग सुरू आहे.

हे प्रकल्प रिकामे व अर्धवट खानदेशात धुळे जिल्ह्यातील सोनवद व कनोली हे प्रकल्प अर्धवट भरले आहेत. तर जळगाव जिल्ह्यातील अग्नावती व मन्याड या प्रकल्पातील साठा मृतसाठ्यापेक्षा अधिक झालेला नाही. अनेक प्रकल्प भरल्याने खानदेशातील गिरणा, तापी, पांझरा, जामखेडी, रंगावली, सुसरी, भोकरी, मोर आदी नद्यांना चांगले प्रवाही पाणी आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com