मराठा समाजाला विश्वासात घेणार : अशोक चव्हाण

मुंबई : मराठा आरक्षणाच्या न्यायालयीन लढाईत राज्य सरकारची बाजू मांडताना मराठा समाजातील सर्व घटकांना विश्वासात घेऊन सर्वतोपरी प्रयत्न सुरू असल्याचे मराठा आरक्षण उपसमितीचे अध्यक्ष  आणि सार्वजनिक बांधकाम मंत्री अशोक चव्हाण यांनी सांगितले. मराठा आरक्षणाच्या संदर्भात स्थापन करण्यात आलेल्या मंत्रिमंडळ उपसमितीची व्हिडिओ कॉन्फरन्सिंगच्या माध्यमातून बैठक झाली. ‘‘मराठा आरक्षणाच्या न्यायालयीन प्रकरणांच्या तयारीबाबत जाणीवपूर्वक अफवा पसरवल्या जात आहेत. परंतु,विधिमंडळाने सर्व सहमतीने पारित केलेले मराठा आरक्षण कायम ठेवण्यासाठी राज्य सरकारची भक्कम तयारी आहे. समितीचे सदस्य एकनाथ शिंदे यांनीही बैठकीत आपली भूमिका मांडली. समाजाकडून मिळणाऱ्या सहकार्याबद्दल त्यांनी सर्वांचे आभार मानले. न्यायालयीन लढा जिंकण्यासाठी सरकार कोणतीही कसर ठेवणार नाही,’’ असे मंत्री चव्हाण यांनी सांगितले   दिलीप वळसे-पाटील यांनी  मराठा आरक्षण कायम ठेवण्यासाठी समाजातील सर्व घटकांचे सहकार्य यापुढेही घेतले जाईल असे सांगितले. तर बाळासाहेब थोरात यांनी या बैठकीतून अनेक चांगले मुद्दे समोर आल्याचे सांगितले. या मुद्यावर असलेली एकजूट पाहता मराठा आरक्षण सर्वोच्च न्यायालयातही निश्चितपणे कायम राहील, असा ठाम विश्वास त्यांनी व्यक्त केला. बैठकीला इतर मागासवर्गीय कल्याण मंत्री विजय वडेट्टीवार, खासदार छत्रपती संभाजी राजे, आमदार विनायक मेटे यांच्यासह अधिकारी आणि वकील उपस्थित होते.