मराठवाड्यात दीर्घ खंडानंतर सर्वदूर पाऊस

औरंगाबाद : मराठवाड्यात दीर्घ खंडानंतर मराठवाड्यातील आठही जिल्ह्यांत गुरुवारी (ता. १६) सकाळपर्यंतच्या चोवीस तासांत सर्वदूर हलक्‍या, मध्यम ते दमदार पावसाने हजेरी लावली. उस्मानाबाद व नांदेड जिल्ह्यांत पावसाचा जोर अधिक होता. या दोन्ही जिल्ह्यांतील १३ मंडळांत ६५ मिलिमीटरपेक्षा जास्त पावसाची नोंद झाली.

उस्मानाबाद जिल्ह्यातील मंगरूळ मंडळात सर्वाधिक १५० मिलिमीटर पावसाची नोंद झाली. बुधवारी रात्री सुरू झालेल्या या पावसाचा जोर गुरुवारी पहाटेपासून बहुतांश भागात वाढला होता. दुपारी दोन वाजेपर्यंत कमी अधिक प्रमाणात पाऊस सुरूच होता. जालना जिल्ह्यातील परतूर, मंठा, परभणी जिल्ह्यातील पालम वगळता सर्व तालुक्‍यांत, हिंगोली जिल्ह्यात सर्वदूर, नांदेड जिल्ह्यातील देगलूर, नायगाव वगळता उर्वरित चौदा तालुक्‍यांत, बीड जिल्ह्यातील आष्टी शिरूर, कासार वगळता सर्वदूर, लातूर जिल्ह्यातील शिरूर अनंतपाळ तालुक्‍यातील काही भाग वगळता उर्वरित सर्व तालुक्‍यांत सर्वदूर, तर उस्मानाबाद जिल्ह्यात सर्वदूर पावसाची दमदार ते जोरदार हजेरी राहिली.

जालना, परभणी, हिंगोली, नांदेड, बीड, लातूर उस्मानाबाद या सात जिल्ह्यांतील २२ तालुक्‍यांत सरासरी ३० ते ८९ मिलिमीटरदरम्यान पावसाची नोंद झाली. हिंगोली जिल्ह्यातील औंढा नागनाथ तालुक्‍यात सरासरी ५३.२५ मिलिमीटर, नांदेड जिल्ह्यातील भोकर तालुक्‍यात सरासरी ५०. २५ मिलिमीटर, किनवट तालुक्‍यात ५०.७१ मिलिमीटर, माहूर तालुक्‍यात ६२ मिलिमीटर, लातूर जिल्ह्यातील जळकोट तालुक्‍यात ५६ मिलिमीटर, उस्मानाबाद जिल्ह्यातील तुळजापूर तालुक्‍यात ८९.४३ मिलिमीटर, लोहारा तालुक्‍यात सरासरी ५५.६७ मिलिमीटर, पावसाची नोंद झाली. उस्मानाबाद जिल्ह्यातील सर्वाधिक १५० मिलिमीटर पावसाची नोंद झालेल्या मंगरूळ मंडळापाठोपाठ इटकळ मंडळात १२५ मिलिमीटर पावसाची नोंद झाली.

तेरा मंडळांत ६५ मिलिमीटरपेक्षा जास्त पाऊस मराठवाड्यातील तेरा मंडळात ६५ मिलिमीटरपेक्षा जास्त पावसाची नोंद झाली. यामध्ये नांदेड जिल्ह्यातील सहा तर उस्मानाबाद जिल्ह्यातील सात मंडळांचा समावेश आहे. गुरुवारी सकाळी आठ वाजेपर्यंतच्या चोवीस तासांनंतरही मराठवाड्यातील बहुतांश भागात दुपारी दोन वाजेपर्यंत पावसाचा जोर कमी अधिक प्रमाणात कायम होता.