मराठवाडा रेशीम शेतीचा केंद्र बिंदू ः डॉ. ढवण

जालना : ‘‘हवामान बदलानुसार योग्य त्या पिकांच्या लागवडीमध्ये रेशीम शेती, बांबू शेतीसारख्या पिकांच्या लागवडीवर भर दिला जात आहे. नवीन आव्हानांचा वेध घेऊन शेतकरी, कृषी शास्त्रज्ञ व यंत्रणा काम करत असते. या बदलात मराठवाडा  रेशीम शेतीचा केंद्र बिंदू ठरला आहे. रेशीम शेती महाविद्यालयाचा प्रस्ताव शासनाकडे दिला आहे. हे महाविद्यालय जालन्यात व्हावे’’, अशी अपेक्षा वसंतराव नाईक मराठवाडा कृषी विद्यापीठाचे कुलगुरू डॉ. अशोक ढवण यांनी व्यक्त केली. 

मराठवाडा शेती साहित्य मंडळांतर्गत खरपुडी येथील कृषी विज्ञान केंद्रातर्फे शुक्रवारी (ता.२६) ऑनलाइन कृषी तंत्रज्ञान महोत्सवाला सुरुवात झाली. उदघाटक म्हणून कुलगुरू डॉ. ढवण बोलत होते. २८ फेब्रुवारीपर्यंत हा महोत्सव चालेल. 

कार्यक्रमाचे अध्यक्ष विजय बोराडे म्हणाले,  ‘‘शाश्वत शेतीची गरज आता वाढत जाईल. त्याप्रमाणे रेशीम , बांबू आणि सुगंधी वनस्पतींची लागवड केली आहे. जोड धंदा म्हणून कोंबडी पालन, शेळी पालनासारख्या गोष्टीची गरज भविष्यात शेतकऱ्यांना पडेल.’’ 

अटारीचे संचालक डॉ. लाखन सिंग म्हणाले, ‘‘उत्पादनवाढीसाठी केव्हीके मोलाचे काम करते. दुष्काळावर मात करण्यासाठी नियमित प्रयत्न असतो. रेशीम शेतीमध्येही मोठे योगदान दिले. मूल्यवर्धनावर केंद्राने जास्त भर द्यावा.’’ 

विभागीय कृषी सहसंचालक डॉ. डी. एल. जाधव म्हणाले, ‘‘केव्हीके, कृषी विद्यापीठ, कृषी विभाग यांच्या मदतीनेच अन्नधान्यांचे विक्रमी उत्पादन आले. शेतकऱ्यांनी उत्पादन वाढविणे आवश्यक आहे.’’ 

आज घडणार ऑनलाइन प्रक्षेत्र भेट 

या महोत्सवात आज स्लाइडशोच्या माध्यमातून ऑनलाइन प्रक्षेत्र भेट घडवून आणली जाणार आहे. यामध्ये पीक प्रात्यक्षिके, फळबाग, भाजीपाला, बांबू प्रजाती, सुगंधी वनस्पती यावर तज्ज्ञ मार्गदर्शन करतील. उद्या (ता.२८) देखील विविध विषयांवर मार्गदर्शन होईल. त्यानंतर महोत्सवाचा समारोप होईल.