दसरा, दिवाळीसाठी चांदवड तालुक्यात झेंडूची लागवड

नाशिक  : चांदवड तालुक्यातील शेतकरी दसरा, दिवाळी सणांचा विचार करून झेंडूचे पीक घेतात. कल्याण, दादर यांसह नाशिक शहरामध्ये झेंडूच्या फुलाला चांगली मागणी असल्याने शेतकरी झेंडूची शेती फुलवू लागले आहेत. त्यामुळे कधी ही न होणारे झेंडूचे क्षेत्र या भागात वाढत आहे.  चांदवड तालुक्यात आजमितीस निमगव्हाण, हिवरखेडा, पाटदशेंबे गावांमध्ये मोठ्या प्रमाणात झेंडू लागवड केली जात आहे. योग्य नियोजन व योग्य भाव हे झेंडू फुलशेतीच्या लागवडीचे गमक असून झेंडू लागवडीचे क्षेत्र दिवसेंदिवस वाढत आहे. चालू वर्षी १०० एकर हून अधिक क्षेत्रावर लागवड झाल्याचे शेतकरी सांगतात. पूर्वी झेंडू शेतीविषयी माहिती कमी असल्याने व चांगली बाजारपेठ मिळत नसल्याने शेतकरी झेंडू लागवडीस अनुकूल नसत. मात्र, गेल्या काही वर्षांपासून झेंडू शेतीविषयी उपलब्ध होणारी माहिती, दर्जेदार उत्पादन, योग्य भाव यांमुळे शेतकऱ्यांचा झेंडू शेतीकडे कल वाढला आहे. खत व पाणी व्यवस्थापन करून झेंडू पीक घेतले जाते.  व्यापाऱ्यांकडून झेंडूला मागणी मोठ्या प्रमाणावर असते. अनेक व्यापारी येथे दाखल होत असतात. त्यामुळे हे पीक शेतकऱ्यांना अधिक लाभ देणारे असते. श्रावण महिन्याच्या सुरवातीस लागवड केली आहे. जुलै महिन्याच्या पहिल्या आठवड्यात झेंडूची रोपे तयार करून लागवड केली जाते. यासाठी पिवळा व केसरी रंगाच्या वाणांची निवड केली जाते. महाराष्ट्रात दादर, कल्याण, वाशी यांसह गुजरातमधल्या अहमदाबाद येथेही झेंडूला मोठी बाजारपेठ असून तालुक्यातील बहुसंख्य झेंडू उत्पादक शेतकरी आपला माल याठिकाणी विक्रीस नेत आहेत. प्रतिकिलो असलेला या फुलांचा भाव नवरात्रीच्या व दिवाळीच्या काळात ९० ते १०० रुपयांपर्यंत पोचत असल्याचे शेतकरी सांगतात. 

जुलै महिन्याच्या शेवटच्या आठवड्यात लागवड केल्यास नवरात्र-दसरा व दिवाळीत फुले काढणीस येतात, या कालावधीतच झेंडूच्या फुलांना चांगला भाव मिळतो. आता उत्पादन व विक्री आम्हीच करत असल्याने दोन पैसे अधिक मिळतात.  - शैलेश जाधव, झेंडू उत्पादक शेतकरी, निमगव्हाण, ता. चांदवड