मुंबई बाजार समितीच्या निवडणुकीची ‘कागदोपत्री’ तयारी सुरू

संग्रहित छायाचित्र
संग्रहित छायाचित्र

पुणे  ः चटई निर्देशाकांसह कोट्यवधी रुपयांच्या गैरव्यवहारप्रकरणी २०१४ मध्ये बरखास्त करण्यात आलेल्या मुंबई कृषी उत्पन्न बाजार समितीच्या निवडणुकीची ‘कागदोपत्री’ तयारी सुरू करण्यात आली आहे. उच्च न्यायालयाच्या आदेशाने ही तयारी सुरू असून, नुकतीच महाधिवक्‍त्यांच्या अध्यक्षतेखील कालबद्ध कार्यक्रम निश्‍चिती आणि अंमलबजावणीबाबत बैठक झाली. येत्या गुरुवारी (ता. २२) पुन्हा मतदारयादीच्या रचनेबाबत बैठक होणार आहे. 

देशातील सर्वात मोठ्या समजल्या जाणाऱ्या काही बाजार समित्यांमध्ये मुंबई बाजार समितीचा समावेश आहे. या बाजार समितीवर वर्चस्व प्रस्थापित करण्यासाठी सर्वच राजकीय पक्षांची स्पर्धा असते. या बाजार समितीवर नेहेमीच काँग्रेस, राष्‍ट्रवादी काँग्रेसचे वर्चस्व राहिलेले आहे. बाजार समितीच्या संचालकपदावर मोठ्या संख्येने आमदार, खासदारांनी काम केले आहे. २०१४ मध्ये चटई निर्देशांक घोटाळ्यासह कोट्यवधी रुपयांचे आर्थिक गैरव्यवहार प्रकरण उघडकीस आले होते. या गैरव्यवहारांची दखल घेत तत्कालीन पणन संचालक डॉ. सुभाष माने यांनी संचालक मंडळ बरखास्त केले होते. त्यानंतर या बाजार समितीवर प्रशासकांची नियुक्ती करण्यात आली आहे.

बाजार समितीची निवडणूक घेण्याबाबत न्यायालयात याचिका दाखल झाल्या होत्या, या याचिकांची दखल घेत उच्च न्यायालयाने सरकारला निवडणूक घेण्याबाबतच्या सूचना केल्या. यानंतर महाधिवक्त्याच्या अध्यक्षतेखाली नुकतीच बैठक झाली. या बैठकीत निवडणुकीची कार्यक्रम निश्‍चिती आणि अंमलबजावणीबाबत चर्चा झाली. गुरुवारी पुन्हा बैठक होणार असून, त्या अगोदर निवडणूक निर्णय अधिकारी आणि ठाण्याच्या जिल्हाधिकारी अपर्ण सोमाणी - आरोलकर यांनी सोमवारी (ता. १९) मतदारयादी निश्‍चितीबाबत बैठक आयोजित केली आहे. या बैठकीला पणन संचालक, राज्य सहकारी निवडणूक प्राधिकरणाचे सचिव, बाजार समितीचे प्रशासक किंवा सचिव आणि जिल्हा उपनिबंधकांना आमंत्रित करण्यात आले आहे.

निवडणूक नाहीच?  न्यायालयाच्या आदेशानुसार जरी निवडणुकीची तयारी सुरू करण्यात आली असली, तरी केंद्र शासनाच्या नवीन मॉडेल ॲक्टनुसार पुणे, मुंबई, नाशिक, नागपूर या बाजार समित्यांना राष्ट्रीय दर्जा देण्यात येणार आहे. याबाबतचे विधेयक राज्यपालांच्या सहीने मंजूर देखील झाले होते. या विधेयकाला दुरुस्तीसाठी स्थगिती देण्यात आली असून, नवीन सरकार आल्यानंतर या विधेयकाला मंजुरी मिळेल आणि त्यानंतर या बाजार समित्या निवडणूक प्रक्रियेतून वगळण्यात येणार आहेत. त्यामुळे सध्याची निवडणुकीची तयारी ही केवळ वेळ मारून नेण्यासाठीची प्रक्रिया असल्याचे बोलले जात आहे. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com