जळगाव जिल्ह्यातील बाजार समित्या सुरू

जळगाव : कमी दर्जाचा शेतीमाल किंवा धान्य (नॉन एफएक्‍यू) हमीभावापेक्षा कमी दरात खरेदी करण्याची मुभा शासनाच्या यंत्रणांनी दिल्याने जिल्ह्यातील जळगाव, पाचोरा, चाळीसगाव येथील बाजार समित्या सुरू झाल्या आहेत. काही ठिकाणी मुगाची खरेदी सुरू झाली आहे. परंतु चोपडा, जळगाव, अमळनेर येथील काही व्यापाऱ्यांनी आपल्याला नॉन एफएक्‍यू शेतीमाल हमीभावापेक्षा कमी दरात खरेदीसंबंधी लेखी हमी किंवा पत्र शासनाने द्यावे, अशी भूमिका कायम ठेवली आहे.

लेखी हमीऐवजी संबंधित सर्व बाजार समित्यांमध्ये नॉन एफएक्‍यू माल कोणता हे निश्‍चित करण्यासाठी संबंधित तालुक्‍यातील सहायक निबंधक, तालुका कृषी अधिकारी व बाजार समितीमधील सचिव यांची त्रिसदस्यीय समिती केली जात आहे. या समितीने शेतीमालाची प्रतवारी निश्‍चित केली म्हणजे व्यापारी हमीभावापेक्षा कमी दरात खरेदी करू शकतील, असे जिल्हा उपनिबंधक यांनी व्यापाऱ्यांना सांगितले आहे. व्यापारी व प्रशासन यांची संयुक्त बैठक यासंबंधी नुकतीच झाली. मार्केटिंग फेडरेशनचे जिल्हा पणन अधिकारी परिमल साळुंखे, जिल्हा उपनिबंधक विशाल जाधवर, व्यापाऱ्यांचे प्रतिनिधी म्हणून शशिकांत बियाणी, अशोक राठी, मांगीलाल जैन आदी उपस्थित होते.  

त्रिसदस्यीय समितीचा विषय व्यापाऱ्यांनी स्वीकारला. परंतु काही तक्रारी नको, कुणी पोलिसात तक्रार केली, तर अडचण नको म्हणून कायदेशीर संरक्षण हवे आहे. हमीभावापेक्षा कमी दरात खरेदीसंबंधीची लेखी हमी आपल्याला हवी आहे, अशी मागणी केली. ती मिळालेली नसली तरी जिल्हा उपनिबंधक यांच्या निर्देशानुसार गुरुवारी (ता. ६) खरेदी सुरू झाली. मुगाची आवक मध्यंतरी झाली होती. त्याचे लिलाव पार पाडल्याचे सांगण्यात आले. यावल, चोपडा येथे मात्र फारसे व्यवहार झाले नाहीत. जामनेरातही किरकोळ व्यवहार झाल्याची माहिती मिळाली. त्यामुळे आता शेतीमाल विक्री होणार आहे.

मुगाला पाच हजारांचा दर नॉन एफएक्‍यू मुगाला पाच हजार रुपये प्रतिक्विंटलचा दर आहे. उडदालाही ५५०० रुपयांपेक्षा अधिक दर आहे. दरांचा घोळ सुरू असतानाच शासनाने हमीभावात खरेदी सुरू करावी. जिल्हाभरात २० खरेदी केंद्र सुरू करण्याची मागणी शेतकऱ्यांनी केली आहे.