शेतीमाल प्रक्रियेला चालना देण्यासाठी मेगा फूड पार्कची उभारणी : हणमंतराव गायकवाड

भेंडा, जि. नगर  : बीव्हीजी ग्रुपने स्वच्छता करणे, रुग्णांना अॅम्ब्युलन्सची सेवा पुरवणे अशी कामे हाती घेतली. त्याचबरोबर शेतीप्रश्न सोडविण्याचाही निर्णय घेतला. शेतीवर होणारा खर्च वाढला आहे. त्या तुलनेत शेतीमालाला दर मिळत नाही. म्हणून शेतीमालावर आधारित असलेल्या प्रक्रियेला चालना देण्यासाठी मेगा फूड पार्क या प्रक्रिया प्रकल्पाची उभारणी केली, असे प्रतिपादन भारत विकास ग्रुपचे (बीव्हीजी) अध्यक्ष हणमंतराव गायकवाड यांनी केले.

भेंडा (ता. नेवासा) येथील श्री ज्ञानेश्वर सहकारी साखर कारखाना व उद्योग समूहाचे संस्थापक लोकनेते मारुतरावजी घुले पाटील यांच्या ८८ व्या जयंती निमित्त ज्ञानेश्वर कारखाना सांस्कृतिक मंडळाच्यावतीने लोकनेते मारुतरावजी घुले पाटील स्मृती पुरस्कार भारत विकास ग्रुपचे (बीव्हीजी) अध्यक्ष हणमंतराव गायकवाड यांना माजी आमदार डॉ. नरेंद्र घुले पाटील यांचे हस्ते शनिवारी (ता. १५) प्रदान करण्यात आला.

कारखान्याचे अध्यक्ष, माजी आमदार चंद्रशेखर घुले पाटील, उपाध्यक्ष, माजी आमदार पांडुरंग अभंग, ज्येष्ठ संचालक अॅड. देसाई देशमुख, माजी खासदार तुकाराम गडाख, डॉ. क्षितीज घुले पाटील, संचालक काकासाहेब नरवडे, जिल्हा परिषदेचे माजी अध्यक्ष विठ्ठलराव लंघे, काशिनाथ नवले, नागेबाबा मल्टिस्टेट पतसंस्थेचे अध्यक्ष कडूभाऊ काळे, अशोक कारखान्याचे अध्यक्ष दिगंबर शिंदे, दिलीपराव लांडे, भाऊसाहेब पटारे, बानाभाऊ सुकाळकर, अरुण लांडे पाटील, कार्यकारी संचालक अनिल शेवाळे, कामगार संचालक सुखदेव फुलारी या वेळी उपस्थित होते.

श्री. गायकवाड म्हणाले, की शेतीआधारित विविध घटकांना चालना देण्याचा भारत विकास ग्रुफमार्फत (बीव्हीजी) निर्णय घेतला. सुरवातीला रसायन अवशेषमुक्त अन्नधान्याचे उत्पादन घेण्याचा निर्णय घेतला. येत्या काळात चांगल्या प्रकारे रसायन अवशेषमुक्त  शेतीमाल उत्पादित होणार आहे. याशिवाय पिकांवर रोग, किडीचा प्रादुर्भाव होत आहे. त्यावर मात करण्यासाठी जैविक कीडनाशकांची निर्मिती केली जात आहे. तसेच माती व पाणी परीक्षणाची सुविधा शेतकऱ्यांना नाममात्र दरात उपलब्ध करून देण्यात येत आहे. या वेळी कारखान्याचे सरव्यवस्थापक काकासाहेब शिंदे यांनी प्रास्तविक केले. मोहन देशमुख यांनी यांनी आभार मानले.