शेतकऱ्यांना दिलासा देण्यासाठी उपाययोजना ः पालकमंत्री शिंदे

नगर : टंचाईसदृश परिस्थिती राज्य शासनाने गांभीर्याने घेतली आहे. जाहीर केल्याने विविध सवलती दुष्काळी तालुक्यासाठी लागू करण्यात आल्या आहेत. शेतकऱ्यांना दिलासा देण्यासाठी प्रभावी उपाययोजना करणार आहोत, असे पालकमंत्री राम शिंदे यांनी सांगितले.

शिंदे यांनी बुधवारी ता. २४ पारनेर, श्रीगोंदा आणि कर्जत तालुक्यांतील टंचाईसदृश परिस्थितीची पाहणी केली. आमदार विजय औटी, जिल्हाधिकारी राहुल द्विवेदी, जिल्हा परिषदेचे मुख्य कार्यकारी अधिकारी विश्वजीत माने, आमदार राहुल जगताप, माजी मंत्री बबनराव पाचपुते यांच्यासह विविध पदाधिकारी उपस्थित होते.

पारनेर तालुक्यातील काळकुप, जामगाव या गावांना भेटी दिल्या. तेथील कोरड्या पडलेल्या विहिरी, तसेच पिकांची पाहणी या वेळी त्यांनी केली. त्यानंतर पंचायत समिती कार्यालय, पारनेर येथे टंचाई आढावा बैठक घेतली.

शिंदे म्हणाले, ‘ज्या गावांची टॅंकरची मागणी असेल, त्या गावांचे प्रस्ताव तात्काळ मंजूर करा, आगामी काळात पाणी आणि चारा यांचे नियोजन करून त्याची उपलब्धता कशी होईल हे पाहा. मागेल त्याला काम याप्रमाणे रोहयोच्या कामांचे शेल्फ तयार करा. सध्याच्या परिस्थितीत एकत्रित आणि समन्वयाने काम करण्याची गरज असल्याचे सांगून राज्य शासन शेतकऱ्यांच्या पाठीशी आहे. पाझर तलावातील गाळ काढण्याची मोहीम हाती घ्या, वनतळी, सीसीटी, रोपवाटिकानिर्मिती, चारानियोजन, पशुधनाची काळजी आदी बाबींकडे लक्ष देण्याची गरज आहे. पाणी जपून वापरा, नावीन्यपूर्ण योजनांमधून निधी उपलब्ध करून दिला जाईल, टँकर मागणी संदर्भातील प्रस्ताव तपासून तात्काळ मंजूर केला जाईल. बोंड अळीचे २ कोटी ७६ लाख अनुदान वाटप करण्यात आले आहे. हुमणी अळीच्या प्रादुर्भावासंदर्भात लवकरच राज्य शासन कार्यवाही करेल, असेही त्यांनी स्पष्ट केले. टंचाईसदृश स्थितीच्या अनुषंगाने शासनाने जाहीर केलेल्या सवलतींचा लाभ या भागातील नागरिकांना मिळेल.