अकोला ः विधानसभा निवडणुकीच्‍या अनुषंगाने जिल्हा प्रशासनाने निवडणूक पूर्व तयारी केली असून अकोला जिल्ह्यात निर्भय, निष्पक्ष निवडणूक घेण्यासाठी यंत्रणा सज्ज असल्याचे जिल्हाधिकारी तथा जिल्हा निवडणूक अधिकारी जितेंद्र पापळकर यांनी सांगितले. शनिवारी (ता. २१) सायंकाळी घेतलेल्या पत्रकार परिषदेत ते बोलत होते.
या वेळी जिल्हाधिकारी पापळकर यांच्यासह जिल्हा परिषदेचे मुख्य कार्यकारी अधिकारी आयुष प्रसाद, पोलिस अधीक्षक अमोघ गावकर, अपर जिल्हाधिकारी नरेंद्र लोणकर, निवासी उपजिल्हाधिकारी राम लठाड, निवडणूक उपजिल्हाधिकारी राजेश खवले, राज्य उत्पादन शुल्क विभागाच्या अधीक्षक स्नेहा सराफ, उपजिल्हाधिकारी गजानन सुरंजे, नीलेश अपार, अतुल दोड तसेच सर्व निवडणूक निर्णय अधिकारी व नोडल अधिकारी उपस्थित होते.
ते पुढे म्हणाले, निवडणूक मुक्‍त, निर्भय व शांततामय वातावरणात पार पाडण्‍यासाठी मतदारांमध्‍ये जनजागृतीपर (स्‍वीप) कार्यक्रमाचे आयोजन करण्यात येत आहे. कोणत्‍याही अपप्रचाराला किंवा आमिषाला बळी न पडता स्‍वतःच्‍या विवेक बुद्धीने मतदान करावे. जिल्ह्यातील शस्‍त्र परवानाधारकांना त्‍यांच्याकडील शस्‍त्र जवळच्‍या पोलिस ठाण्यामध्‍ये जमा करण्याबाबत निर्देश देण्‍यात आले असून कायदा व सुव्‍यवस्‍थेच्‍या अनुषंगाने पोलिस प्रशासनामार्फत पोलिस बल तैनात ठेवण्‍यात आले आहे. अवैध दारू भट्टी व अवैध धंदे याबाबत धाडसत्राव्‍दारे प्रतिबंधात्‍मक कार्यवाही करण्यात येत आहे, अशी माहिती पोलिस अधीक्षक गावकर यांनी दिली.
नागरिकांनासुद्धा कोणतीही आक्षेपार्ह बाब निदर्शनास आल्‍यास त्‍याकरिता CVIGIL अॅपव्‍दारे तक्रार करण्‍याची सुविधा उपलब्ध करण्यात आली आहे. तसेच, निवडणूक निर्णय अधिकारी यांच्यास्‍तरावर भरारी पथक, व्हिडिओ पाहणी पथक, स्थिर पथक, खर्च निरीक्षण पथक आदी स्‍थापन करण्यात आलेले आहेत. निवडणूक आदर्श आचारसंहितेच्‍या अनुषंगाने निवडणूक आयोगाने निर्गमित केलेल्‍या सूचनेनुसार शासकीय, निमशासकीय कार्यालय आणि परिसरातून भिंतीवरील लेखन, पोस्‍टर्स, कट आऊटस, होर्डीग्‍स, बॅनर्स, झेंडे इत्‍यादी त्‍वरीत काढून टाकण्याचे निर्देश दिले आहेत.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.