कृषी सहायकांच्या प्रश्नांवर आज कृषिमंत्र्यांनी बोलावली बैठक

अकोला ः अमरावती विभागातील रखडलेल्या कृषी सहायक ते कृषी पर्यवेक्षक पदोन्नतीच्या मागणीसाठी सुरू असलेल्या आंदोलनाची दखल घेत राज्याचे कृषिमंत्री डॉ. अनिल बोंडे यांनी मंगळवारी (ता. २७) मुंबईत बैठक बोलविली आहे. या बैठकीत काय तोडगा निघतो यावर कृषी सहायकांच्या आंदोलनाची पुढील दिशा ठरणार आहे. 

अमरावती विभागातील पाच जिल्ह्यांतील कृषी सहायकांना कृषी पर्यवेक्षकपदी वर्षानुवर्षे पदोन्नती मिळालेली नाही. अनेकजण पात्र असूनही त्यांना हक्काची पदोन्नती मिळालेली नसल्याने आहे त्याच पदावर काम करीत आहेत. या प्रश्नाकडे लक्ष वेधण्यासाठी कृषी सहायक संघटनेने टप्प्याटप्‍याने आंदोलन छेडले आहे. सोमवार (ता. २६) पासून अमरावती विभागीय सहसंचालक कार्यालयासमोर साखळी उपोषण सुरू करण्यात आले. यापूर्वी गुरुवारी (ता. २२) अमरावती विभागीय कृषी सहसंचालक कार्यालयासमोर झालेल्या धरणे आंदोलनात अकोला, अमरावती, बुलडाणा, वाशीम, यवतमाळ या जिल्ह्यांत कार्यरत असलेले शेकडो कृषी सहायक धरणे देण्यासाठी एकवटले होते. 

अमरावती विभागात सन २०११ मध्ये कृषी सहायक ते कृषी पर्यवेक्षक पदोन्नत्या करण्यात आल्या. त्यानंतर गेल्या आठ वर्षांत ही प्रक्रिया या विभागात राबविण्यात आलेली नाही. २०११ ची पदोन्नती प्रक्रिया अंतरिम ज्येष्ठता यादीच्या आधारे तदर्थ पदोन्नती देऊन करण्यात आली होती. त्यानंतर ज्येष्ठता यादी २७ आॅक्टोबर २०१५ ला प्रमाणित करून अंतिम करण्यात आली. ही सूची अंतिम मानल्यास २०११ मध्ये दिलेल्या तदर्थ स्वरूपाच्या पदोन्नत्या चुकीच्या पद्धतीने झाल्या हेही स्पष्ट होते. तदर्थ पदोन्नती मिळालेले काही जण महाराष्ट्र प्रशासकीय न्यायाधिकरणाच्या नागपूर खंडपीठात अपिलात गेलेले असल्याने ही प्रक्रिया पुढे जाऊ शकलेली नाही. जोपर्यंत न्यायालयीन प्रकरणाचा न्यायनिवाडा पूर्ण होत नाही, तोवर कृषी सहायकांना पदोन्नती देण्यात अडचणी निर्माण झालेल्या आहेत. 

साखळी उपोषण सुरू  कृषी सहायकांनी मागण्यांसाठी साखळी उपोषण सुरू केले आहे. या आंदोलनात बुधवारी (ता. २८) अकोला व वाशीम जिल्ह्यातील आणि गुरुवारी (ता. २९) बुलडाणा जिल्ह्यातील कृषी सहायक सहभागी होत आहेत.