भारिप बहुजन महासंघासोबत ‘स्वाभिमानी’ची आघाडीसाठी चाचपणी

अकोला  ः राज्यात अागामी निवडणुकीत स्वाभिमानी पक्ष ताकदीने मैदानात उतरण्याच्या हालचाली करीत अाहे. याचाच एक भाग म्हणून शनिवारी (ता.२९) भारिप बहुजन महासंघाचे नेते ॲड. प्रकाश अांबेडकर यांची रविकांत तुपकर यांनी अकोल्यात भेट घेतली. या दोघांमध्ये  बराचवेळ चर्चा झाली असून, यापुढील बैठक मुंबईत येत्या ६ अाॅक्टोबरला होणार असल्याचे समजते. या वेळी ‘स्वाभिमानी’चे खासदार राजू शेट्टी श्री. अांबेडकर यांची भेट घेऊन अाघाडीबाबत चर्चा करणार अाहेत.

स्वाभिमानी शेतकरी संघटना गेल्या वेळी भाजपसोबत होती. मात्र, शेतकऱ्यांच्या प्रश्नांवरून संघटना सत्तेपासून दूर झाली. आगामी काळात होणाऱ्या लोकसभा निवडणुकीच्या ‘फडात’ उतरण्यासाठी विविध पक्षांसोबत अाघाडीबाबत ‘स्वाभिमानी’च्या नेत्यांच्या बैठका होत अाहेत. काँग्रेस-राष्ट्रवादी काँग्रेस अाघाडीच्या नेत्यांसोबतसुद्धा बैठक झाली. अद्याप मात्र याअनुषंगाने ठोस काही झालेले दिसत नाही. हे लक्षात घेता अाता ‘स्वाभिमानी’ने भारिप बहुजन महासंघासोबत चर्चा सुरू केली अाहे.  

भारिप- बहुजन महासंघासोबत अाघाडी झाल्यास राज्यात काही मतदारसंघात ‘स्वाभिमानी’ला चांगला फायदा होऊ शकतो. प्रामुख्याने बुलडाणा लोकसभा मतदारसंघात स्वाभिमानी संघटना प्रदेशाध्यक्ष रविकांत तुपकर यांना रिंगणात उतरविण्याच्या तयारीत अाहे. त्यांनीही जिल्हाभर दौरे सुरू करून वातावरण निर्मिती सुरू केली. या जिल्ह्यातील काही भागात भारिप-बहुजन महासंघाची चांगली ताकद अाहे. अांबेडकर यांना मानणारा एक मोठा वर्ग अाहे. त्यामुळेच काँग्रेस-राष्ट्रवादीसोबत अाघाडी न झाल्यास ‘भारिप-बमसं’ची मदत मिळवण्याची ‘स्वाभिमानी’ने धडपड सुरू केली अाहे.

येत्या २ अाॅक्टोबरपासून ‘स्वाभिमानी’चे खासदार राजू शेट्टी हे विदर्भ दौऱ्यावर अाहेत. कापूस-सोयाबीन परिषदांमधून ते विदर्भात वातावरण तापविणार हे निश्चित मानले जाते. शनिवारी अकोल्यात झालेल्या बैठकीत प्राथमिक स्वरुपातील चर्चा झाली. या अाघाडीबाबत ६ अाॅक्टोबरच्या बैठकीतून काही निष्पन्न होऊ शकेल.