शरद पवार यांच्या उपस्थितीत ऊसतोडणी मजुरी दरावर  तोडग्यासाठी आज बैठक 

नगर ः ऊसतोडणी मजुरांच्या प्रश्‍नावर तोडगा काढण्यासाठी राष्ट्रवादीचे अध्यक्ष शरद पवार यांच्या उपस्थितीत आज (ता.२७) मांजरी (पुणे) येथील वसंतदादा शुगर इस्टीट्युट येथे बैठकीचे आयोजन केले आहे. 

साखर संघाचे अध्यक्ष, संचालक व राज्यातील सुमारे सात ऊस तोडणी कामगार संघटनांच्या प्रतिनिधींना बैठकींना आमंत्रित केले आहे. बैठकीत ऊसतोडणी कामगारांच्या तोडणी दरात किती वाढ होते हे पाहण्यासाठी कारखानदारांचेही बैठकीकडे लक्ष लागले आहे. 

राज्यातील ऊसतोडणी कामगारांच्या तोडणी दराचा करार संपल्याने नव्याने करार करुन दरात दुप्पट वाढ करावी, अशी मागणी करत ऊसतोडणी कामगार संघटनांनी संप पुकारला आहे. एखादा अपवाद वगळता संपामुळे यंदा अजूनही कामगार कारखान्यावर गेलेले नाहीत. सर्वाधिक सहा लाखाच्या जवळपास ऊसतोडणी मजूर बीड जिल्ह्यात आहेत. मात्र ऊसतोडणी कामगारांच्या संपावरुन राजकारण सुरु झाल्याने कोयते बंदच आहेत. 

त्यातच उसाचे क्षेत्र यंदा अधिक असल्याने कारखान्याचा गाळप हंगाम लांबण्याची शक्‍यता व्यक्त केली जात आहे. संप सुरु असल्याने अनेक कारखाने सुरु झाले नाहीत, आणि चार बैठका होऊनही संपावर तोडगा निघाला नाही. राष्ट्रवादीचे अध्यक्ष शरद पवार यांनी यात लक्ष घालण्याची मागणी होत होती. त्यानुसार आज (ता. २७) मांजरी येथील वसंतदादा शुगर इस्टीट्युट येथे बैठकीचे आयोजन केले आहे. साखर संघाचे अध्यक्ष जयप्रकाश दांडेगावकर, माजीमंत्री पंकजा मुंडे, मंत्री जयंत पाटील, मंत्री धनंजय मुंडे, महसूलमंत्री बाळासाहेब थोरात, सहकारमंत्री बाळासाहेब पाटील, कामगारमंत्री दिलीप वळसे पाटील यांच्यासह राज्यातील सात ऊसतोडणी कामगार संघटनांचे प्रतिनिधी बैठकीला हजर असतील. 

संपाबाबत श्री पवार यांच्या मध्यस्थीने काय निर्णय होणार, मजुरांना किती दरवाढ मिळणार याकडे कामगारांसह साखर कारखानदारांचे लक्ष लागले आहे.