साखर कारखानदारांच्या मदतीसाठी मुख्यमंत्र्यांबरोबर लवकरच बैठक

सोलापूर : साखरेच्या घसरलेल्या दरामुळे कारखानदारांपुढे पेच निर्माण झाला आहे. शेतकऱ्यांना एफआरपीचे पैसे देण्यातही अडचण झाली आहे, या स्थितीत शेतकऱ्यांना त्यांच्या उसाचे पैसे मिळणे गरजेचे आहे. साखर कारखानदारांना मदत करण्याबाबत सरकार सकारात्मक असल्याची माहिती सहकारमंत्री सुभाष देशमुख यांनी दिली. तसेच या संदर्भात चर्चेसाठी लवकरच मुख्यमंत्री देवेंद्र फडणवीस यांच्यासमवेत बैठक होणार असल्याची माहितीही त्यांनी दिली.

सहकारमंत्री देशमुख यांनी "सकाळ'' कार्यालयास भेट दिली. त्या वेळी ते बोलत होते. सहकारमंत्री देशमुख म्हणाले, "साखरेचे दर वाढल्याशिवाय शेतकऱ्यांना उसाचे पैसे देणे शक्‍य नाही, याबाबत केंद्र सरकारकडे साखर निर्यात करण्याबाबतची शिफारस केली जाणार आहे. राज्यातील साखर कारखान्यांना मदत करण्यासाठी मुख्यमंत्री देवेंद्र फडणवीस यांच्या उपस्थितीत या महिनाअखेरीस बैठक होणार आहे.

राज्यात सध्या विजेची उपलब्धता झाली आहे. स्वस्त दरात वीज उपलब्ध होत आहे. त्यामुळे पूर्वी सहा रुपये प्रतियुनिट होणारे विजेबाबतचे करार आता होत नाहीत. विजेच्या युनिटचे दर कमी झाल्यामुळे साखर कारखानदारांकडून काही दिवसांपूर्वी जादा दर देऊन वीज खरेदीबाबत आता महावितरण सकारात्मक दिसत नाही. विजेची उपलब्धता झाल्याने दर कमी झाले आहेत, त्यामुळेच आता साखर कारखानदारांबरोबरचे करार थांबले आहेत.''

सहकारी संस्थांच्या सुनावण्या घेण्याचे अधिकार यापूर्वी सहकारमंत्र्यांना होते. त्यामुळे मोठ्या प्रमाणात अविश्‍वास निर्माण झाला होता. सत्ताधारी पक्षाचे मंत्री विरोधी पक्षांच्या संस्थांच्या बाबतीत पूर्वग्रहदूषित निर्णय घेतात, असा आरोप केला जात होता. त्यामुळे संस्थांच्या संदर्भातील सुनावणीचे अधिकार सचिवांना देण्याचा निर्णय सरकारने घेतला असल्याचेही सहकारमंत्री देशमुख यांनी सांगितले.