एप्रिल, मेमध्ये पारा आणखी वाढणार 

पुणे : गेल्या एक महिन्यापासून राज्यातील अनेक भांगात उन्हाचा कडाका वाढला आहे. राज्याच्या पश्‍चिमेकडे असलेल्या कोकण विभागात चालू एप्रिल मे या दोन महिन्यांत तापमानाचा पारा वाढणार आहे. अनेक ठिकाणी पारा सरासरीपेक्षा अधिक राहण्याची शक्यता आहे. मध्य महाराष्ट्र, मराठवाडा आणि विदर्भात उन्हाच्या झळा तीव्र होणार असल्या, तरी कमाल तापमानाचा पारा सरासरीपेक्षा कमी राहण्याची शक्यता अधिक आहे. दरम्यान जूनमध्ये सर्वसाधारण पावसाची शक्यता वर्तविली आहे. 

भारतीय हवामान विभागाने चालू उन्हाळ्यातील एप्रिल ते जून या तीन महिन्यांतील कमाल आणि किमान तापमानाचा अंदाज नुकताच जाहीर केला आहे. या जाहीर केलेल्या अंदाजानुसार चालू उन्हाळ्यात उत्तर, वायव्य आणि ईशान्य भारतातील राज्यांमध्ये उन्हाचा पारा वाढणार आहेत. तसेच पूर्व किनाऱ्यावरील ओडिशा, छत्तीसगडसह पश्‍चिम किनाऱ्यावरील कोकण, गोव्यात कमाल तापमान सरासरीच्या वरच राहण्याची शक्यता अधिक आहे.  कोकण-गोवा विभागात कमाल तापमानाचा पारा अधिक राहणार असल्याचे स्पष्ट करण्यात आले आहे. 

केंद्रीय पृथ्वी विज्ञान मंत्रालय आणि भारतीय हवामानशास्त्र विभागामार्फत २०१६ पासून उन्हाळा आणि हिवाळा हंगामात उपविभागनिहाय तापमानाचा अंदाज जाहीर केला जातो. मॉन्सून मिशन कपल्ड फोरकास्टिंग सिस्टिम प्रारूपाच्या (मॉडेल) आधारे हवामान विभागाने एप्रिल ते जून २०२१ या तीन महिन्यांतील तापमानाचा अंदाज वर्तविला आहे. 

हवामान विभागाच्या या अंदाजानुसार उत्तर, वायव्य, ईशान्य भारतातील सर्वच विभागांसह, पूर्व किनाऱ्यावरील ओडिशा, छत्तीसगड, आंध्र प्रदेशचा किनारपट्टीय भाग, पश्‍चिम किनाऱ्यावरील गुजरात, सौराष्ट्र, कोकण-गोवा या विभागात कमाल तापमान सरासरीच्या वर राहण्याची शक्यता आहे. तर दक्षिण भारतासह लगतच्या मध्य महाराष्ट्र, मराठवाडा, विदर्भ या मध्य भारतातील विभागात दिवसा कमाल तापमान सरासरी पेक्षा कमी राहण्याची शक्यता अधिक आहे. 

एप्रिल ते जून या तीन महिन्यांच्या कालावधीतील किमान तापमानाचा विचार करता, हिमालय पर्वताचा पायथ्यासह उत्तर भारत, वायव्य भारत, मध्य भारताचा पश्चिम भाग (कोकण-गोवा), दक्षिण भारताच्या किनारपट्टीय भागात किमान तापमान सरासरीच्यावर राहणार आहे. तर पूर्व, मध्य भारतातील बहुतांशी विभागांसह, जम्मू- काश्मीर राज्यात रात्रीचे किमान तापमान सरासरीपेक्षा कमी राहण्याची शक्यता आहे. 

प्रशांत महासागरात ला-निना स्थिती  मध्य आणि पूर्व विषुववृत्तीय प्रशांत महासागरातील समुद्राचे पृष्ठभागाचे तापमान सरासरीपेक्षा कमी असून, या भागात सध्या मध्यम ला-निना स्थिती आहे. उन्हाळ्यातही या भागात ला-निना स्थिती टिकून राहण्याचे संकेत आहे. मात्र येत्या काळात या भागातील तापमानात वाढ झाल्यास त्याचे परिणाम देशातील व  राज्यातील तापमानावर होण्याची शक्यता हवामान विभागाने वर्तविली आहे.