म्हैसाळच्या पाण्यासाठी तलावातच ठिय्या

भोसे, जि. सोलापूर : म्हैसाळचे पाणी शिरनांदगी तलावात सोडण्याच्या मागणीसाठी जिल्हा परिषद सदस्या शैला गोडसे यांनी तलावात सुरू केलेले ठिय्या आंदोलन चौथ्या दिवशीही सुरूच आहे.

आंदोलनाला आतापर्यंत जनहित शेतकरी संघटना, मंगळवेढा तालुका दलित पॅंथर संघटना, शिवबुद्ध युवा प्रतिष्ठान, महाराष्ट्र राज्य संकल्प महिला बहुउद्देशीय संस्था, विकास अपंग स्वयंसहायता समूह आदी विविध संघटनांच्या अध्यक्ष व पदाधिकाऱ्यांनी आंदोलनस्थळी भेट देऊन पाठिंबा दिला. समाज माध्यमात पाणी सोडण्याच्या आदेशाच्या बातम्या आल्या. मात्र प्रत्यक्षात पाणी कधी येणार, या प्रतीक्षेत या भागातील शेतकरी आहेत. त्यामुळे या आंदोलनाची धार वाढली आहे.

आसबेवाडी, मारोळी, बावची, चिखलगी, भोसे, रेड्डे, अहमदाबाद, हुन्नूर, जंगलंगी, पौट, सलगर खु., हुलजंती या भागातील शेतकरीही आंदोलनात सहभागी झाले. पाणी सोडण्याबाबत निर्णय लवकर न झाल्यास आंदोलन चिघळण्याची शक्यता आहे. म्हैसाळ योजनेचे उपअभियंता राजेंद्र गाझी यांनी आंदोलकांची भेट घेतली. पदाधिकारी, अधिकारी भेट देत असले, तरी निर्णय होत नसल्याने नाराजी व्यक्त होत आहे.