सांगली ः म्हैसाळ उपसा सिंचन योजनेच्या ९१, तर ताकारी उपसा सिंचन योजनेच्या ७२ पाणीवाटप संस्था सुरू होणार आहेत. मात्र, अद्यापही या पाणीवाटप संस्थांचे कामकाज सुरू नसल्याचे चित्र आहे. यामुळे पाणीवाटप संस्था कधी सुरू होणार, असा प्रश्‍न शेतकरी उपस्थित करू लागले आहेत.
म्हैसाळ उपसा सिंचन योजनेत मिरज, कवठेमहांकाळ, जत आणि तासगाव हे तालुके समाविष्ट आहेत. या योजनेच्या लाभ क्षेत्रात सुमारे ८० हजार हेक्‍टरहून अधिक क्षेत्र आहे. तासगाव तालुक्‍यातील तीन हजार हेक्‍टरला याचा फायदा होतोय. शासनाने उपसा सिंचन योजनेवर पाणीवाटप संस्था सुरू करण्याचे आदेश दिले आहेत. त्यानुसार सांगली पाटबंधारे विभागाने मार्च २०१८ मध्ये नियोजन सुरू केले. त्याची माहिती शेतकऱ्यांपर्यंत पोहोचली असली तरी, अद्यापही पाटबंधारे विभागाने त्यासाठी हालचाली सुरू केलेल्या दिसत नाहीत.
म्हैसाळ उपसा सिंचन योजना अडचणीत आली आहे. वेळेत पाणीपट्टी वसुली होत नाही. कर्मचारी संख्या कमी अशा विविध योजना सुरळीत चालण्यासाठीच्या नियोजनात अडचणी निर्माण होत आहेत. दरवर्षी थकबाकीत वाढ होते आहे. पाणीपट्टी वसूली वेळेत होत नाही. त्यामुळे प्रत्येक ठिकाणी पाणी वापर संस्था सुरू स्थापन झाल्या तर पाणीपट्टी वसुली वेळेत होईल. त्याचप्रमाणे शेतकऱ्यांना वेळेत पाणी मिळेल. परंतु पाणी वाटप संस्था स्थापन करण्यासाठी शेतकऱ्यांनी हिरवा कंदील दाखवला आहे. मात्र, पाटबंधारे विभागाकडून कोणत्याच हालचाली होत नसल्याने पाणीवाटप संस्था कधी सुरू होणार, असा प्रश्‍न शेतकरी उपस्थित करू लागला आहे.
ताकारी उपसा सिंचन योजनेचे लाभक्षेत्र २७ हजार ४३० हेक्‍टर असून त्यापैकी १५ हजार हेक्‍टर ओलिताखाली आले आहे. या योजनेची पाणीपट्टी वेळेत वसूल होत असली तरी पाण्याचे योग्य नियोजन व्हावे, यासाठी पाणीवाटप संस्था सुरू केल्या जाणार आहेत.
याबाबत पाटबंधारे विभागाच्या अधिकाऱ्यांशी संपर्क केला असता, ते म्हणाले, ‘पाणीवाटप संस्था स्थापन करण्याचे काम हाती घेतले आहे. मतदार यादी तयार झाली आहे. ज्या ठिकाणी पाणीवाटप संस्था सुरू करण्यात येणार आहे. त्या ठिकाणाचा नकाशादेखील तयार केला आहे. येत्या पंधरा ते वीस दिवसांत पाणीवाटप संस्था सुरू करण्याचा आमचा निर्धार आहे. सुरवातीच्या टप्प्यात मिरज, कवठेमहांकाळ आणि तासगाव तालुक्‍यात पाणीवाटप संस्था सुरू होतील. ताकारी उपसा सिंचन योजनेच्या क्षेत्रात पुढील महिनाअखेर पाणीवाटप संस्था सुरू होतील. यामुळे पाणीवाटपाचे नियोजन काटेकोरपणे होईल. तसेच पाणीपट्टीची वसुली वेळेत होणार आहे. यामुळे आवर्तन वेळेत सुरू करण्यात कोणत्याही अडचणी येणार नाहीत.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.