पंढरपूर तालुक्यात १६ हजार लोकांचे स्थलांतर

सोलापूर : अतिवृष्टीमुळे उजनी व वीर धरणातून पाण्याचा मोठ्या प्रमाणात विसर्ग सुरु असल्याने, नीरा व भीमा नदी काठी पूरस्थिती निर्माण झाली आहे. त्यामुळे तालुक्यातील शहरी व ग्रामीण भागासह ४ हजार कुटुंबांतील १६ हजार लोकांना प्रशासनाने सुरक्षित ठिकाणी स्थलांतरित केले आहे.

पंढरपूर शहरासह तालुक्यातील ९५ गावे बाधित झाली आहेत. तालुक्यातील ३३०५ कुटुंबाच्या घरात पाणी शिरले आहे. अतिवृष्टीमुळे पंढरपूर शहरात ६, तर भंडीशेगाव येथील १ अशा सात नागरिकांचा मृत्यू झाला आहे. तालुक्यातील ४४० घरांची पडझड झाली. ४ बंधाऱ्यांचे नुकसान झाल्याचेही प्रांताधिकारी सचिन ढोले यांनी सांगितले. 

शहरातील अंबाबाई पटांगण, व्यासनारायण झोपडपट्टी परिसर, लखुबाई मंदिर परिसर, केंद्रे महाराज मठ, सारडा भवन, तनपुरे महाराज मठ, लोकमान्य शाळा, चैतन्य महाराज मठ, गंगागिरी मठ तसेच पर्यटक निवास येथे नागरिकांना सुरक्षित स्थळी हलविण्यात आले आहे. 

बचाव पथकाचे कार्य वेगाने

जिल्ह्यासह तालुक्यात अतिवृष्टीमुळे तसेच धरणातून सोडलेल्या विसर्गामुळे नदी पात्रात पाण्याचा प्रवाह मोठ्या तीव्रतेने सुरु आहे. नदी पात्राच्या काठावरील कुटुंबांना सुरक्षितस्थळी हलविण्याचे काम प्रशासनाच्या व बचाव पथकाच्या मदतीने सुरु आहे. पंढरपूर तालुक्यातील सरकोली येथील तीन नागरिकांना वजीर रेस्क्यू फोर्सच्या मदतीने नदीच्या पाण्यातून सुखरूप बाहेर काढले.

कौठाळी येथून व्हाइट आर्मीच्या मदतीने नागरिकांना पुराच्या पाण्यातून सुरक्षित स्थळी हलविण्यात आले, असे तहसीलदार वैशाली वाघमारे व गटविकास अधिकारी रविकिरण घोडके यांनी सांगितले