जुना मोंढा भाजीपाला मार्केटचे पाथरी रस्त्यावर स्थलांतर

परभणी ः परभणी शहरातील जुना मोंढा भागातील भाजीपाला मार्केटचे स्थलांतर मंगळवार (ता. १) पासून पाथरी राष्ट्रीय महामार्गावरील कांदा, लसूण, बटाटे, फळे मार्केटमध्ये झाले आहे. या ठिकाणी शेतकऱ्यांकडून लिलाव पद्धतीने भाजीपाला खरेदी केला जात आहे, असे सूत्रांनी सांगितले.

परभणी शहरातील जुना मोंढा भागात महानगर पालिकेच्या मालकीच्या फळे भाजीपाला मार्केटमध्ये शेतमाल घेऊन येणाऱ्या वाहनांमुळे तसेच शहरातील वाहतूक वाढल्यामुळे रहदारीसाठी अडचणीच येत होत्या. त्यामुळे गतवर्षीच्या फेब्रुवारीमध्ये जुन्या मोंढा मार्केटमधून कांदा, लसूण, बटाटे, फळे मार्केटचे स्थलांतर परभणी -पाथरी रस्त्यावरील फ्रुट अॅँड व्हिजिटेबल मर्चंटस असोसिएशनेने विकसित केलेल्या मार्केटमध्ये झाले होते. परंतु भाजीपाला मार्केट मात्र जुना मोंढा येथेच होते. दोन ठिकाणी मार्केट झाल्यामुळे शेतकरी, व्यापाऱ्यांना अडचणी येऊ लागल्या.

दरम्यान, परभणी कृषी उत्पन्न बाजार समितीच्या मार्केट यार्डावर भाजीपाल्याचे लिलाव सुरू करण्यासाठी प्रयत्न केले जात आहेत. त्यासाठी जिल्हा उपनिबंधक कार्यालयाकडे परवानगी मागितली आहे. बाजार समितीच्या मार्केट यार्डावर भाजीपाला खरेदी सुरू शेतकऱ्यांच्या सोयीचे होणार आहे, असे बाजार समितीचे सचिव विलास मस्के यांनी सांगितले.