दूध सल्लागार समिती कागदावरच

राज्यस्तरीय दूध सल्लागार समितीची एकही बैठक दुग्धविकास आयुक्तालयाने घेतली नसल्याचे उघड झाले आहे. समितीचे अस्तित्व केवळ कागदापुरते ठेवण्यात कोणत्या अधिकाऱ्याचा हात आहे, अशी चर्चा आता डेअरी उद्योगात सुरू झाली आहे.
Milk Advisory Committee only on paper
Milk Advisory Committee only on paper

पुणे : राज्यस्तरीय दूध सल्लागार समितीची एकही बैठक दुग्धविकास आयुक्तालयाने घेतली नसल्याचे उघड झाले आहे. समितीचे अस्तित्व केवळ कागदापुरते ठेवण्यात कोणत्या अधिकाऱ्याचा हात आहे, अशी चर्चा आता डेअरी उद्योगात सुरू झाली आहे.

दूध व्यवसायात राज्यातील लाखो शेतकरी गुंतलेले आहेत. त्यामुळे या व्यवसायाबाबत मंत्रालय किंवा सरकारी यंत्रणांकडून परस्पर निर्णय होऊ नयेत. निर्णय घेताना डेअरी उद्योगाचा सल्ला विचारात घ्यावा, असा आग्रह माजी केंद्रीय कृषिमंत्री शरद पवार यांच्याकडे डेअरी उद्योजकांनी धरला होता. ‘‘ही संकल्पना श्री.पवार यांना पटली. कॉंग्रेसचे नेते महसूलमंत्री बाळासाहेब थोरात यांनीही पाठिंबा दर्शविल्याने राज्यस्तरीय समिती स्थापन झाली,’’ असे सूत्रांचे म्हणणे आहे.

नागपूर जिल्हा नूतन दूध संघाचे चेअरमन म्हणून सुनील केदार या समितीत आहेत. ते स्वतः दुग्ध व्यवसाय विकासमंत्री आहेत. याशिवाय राजारामबापू सहकारी दूध संघाचे (ब्रॅन्ड- कृष्णा दूध) चेअरमन विनायकराव पाटील, संगमनेर दूध संघाचे (राजसंह) चेअरमन रणजितसिंह देशमुख, कोल्हापूर दूध संघाचे (गोकूळ) कार्यकारी संचालक दत्तात्रय घाणेकर, औरंगाबाद दूध संघाचे (देवगिरी महानंद) चेअरमन हरिभाऊ बागडे यांना समितीत स्थान दिले गेले आहे.

‘‘समितीने दूध उत्पादकांच्या मागण्या व समस्यांचा वेळोवेळी आढावा घेऊन शासनाला धोरणात्मक सल्ला देणे अपेक्षित होते. दुधाचे उत्पादन वाढावे, शेतकऱ्यांच्या दुधाला रास्त दर मिळावा, खासगी व सहकारी प्रकल्पांमधील हितसंबंधांची जपणूक व्हावी, यासाठी समितीने दोन महिन्यांत एक बैठक घ्यावी, अशा शासनाच्या सूचना होत्या. मात्र, समितीची एकही बैठक होवू दिली गेली नाही. त्यामुळे खासगी व सहकारी डेअरीचालकांमध्ये नाराजी आहे,’’ अशी माहिती सूत्रांनी दिली.

खासगी उद्योगांचा सल्ला पोहचू नये म्हणून... दूध व्यावसायिक सल्लागार समितीची बैठक न घेतल्यामुळे खासगी डेअरी प्रकल्पांना शासनाला सल्ला देण्याचा मार्ग बंद पाडला गेला आहे. ‘‘सोनाई दूध उद्योग समूहाचे अध्यक्ष दशरथदादा माने, चितळे डेअरी समूहाचे अध्यक्ष श्रीपादराव चितळे, पराग (गोवर्धन) मिल्क उद्योगाचे अध्यक्ष प्रीतम शहा, कुतवळ फुडस् कंपनीचे (उर्जा दूध) अध्यक्ष प्रकाश कुतवळ यांना खासगी डेअरी उद्योगातील समस्यांची जाण आहे. तसेच, उपायांची देखील माहिती आहे. मात्र, त्यांचा सल्ला सरकारपर्यंत पोहोचू न देण्यासाठी आडकाठी आणली जाते आहे,’’ अशी सहकारी दूध संघाच्या वर्तुळातून सांगण्यात आले.

राज्यस्तरीय दूध व्यावसायिक सल्लागार समितीची बैठक का घेतली जात नाही, याविषयी डेअरी उद्योग बुचकळ्यात पडला आहे. या समितीचा विसर शासनाला पडला आहे. समितीचे कामकाज चालू ठेवले असते तर राज्यातील शेतकऱ्यांना दूधदराच्या मोठ्या समस्येला तोंड द्यावे लागले नसते. कारण, समिती सदस्यांच्या अनुभवी सल्ल्यामुळे सरकारला प्रभावी उपाय लागू करता आले असते. - प्रकाश कुतवळ, सदस्य, दूध व्यावसायिक सल्लागार समिती.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com