जळगाव जिल्ह्यात दुधाची मागणी वाढली

जळगाव : जिल्ह्यात सणासुदीला दुधाचा कोणताच तुटवडा नाही. शिवाय यंदाच्या दुष्काळी स्थितीचाही परिणाम दूध संकलनावर झालेला नसून, जिल्हा सहकारी दूध उत्पादक संघाचे संकलन प्रतिदिन तीन लाख लिटरपर्यंत आहे. दुधाचे खरेदी व विक्री दरही स्थिर असल्याचे चित्र आहे.

गणेशोत्सव, गौरीचा उत्सव सध्या सुरू आहे. पुढे घटस्थापना, सप्तमी श्राद्ध, नवमी श्राद्धाचे कार्यक्रम आहेत. अशात दुधाची मागणी कायम आहे. ती किंचित स्वरूपात वाढली असून, प्रतिदिन १० ते १२ हजार लिटर दुधाची अधिकची खरेदी सर्व संघ, डेअऱ्यांकडे विक्रेते करीत आहेत. परंतु अतिरिक्त संकलन असल्याने दुधाचा कोणताही तुटवडा नाही. जिल्हा सहकारी दूध उत्पादक संघाकडे प्रतिदिन तीन लाख लिटर दूध संकलन सुरू आहे. यात गायीचे दूध जवळपास पावणेतीन लाख लिटर असून, ७५ हजार लिटर दूध म्हशीचे आहे. संघाकडे प्रतिदिन सुमारे ७० ते ७५ हजार लिटर गायीचे अतिरिक्त दूध येत असल्याने त्याची पावडर तयार करावी लागते. खासगी डेअऱ्यांचे संकलन ५० ते ५५ हजार लिटर प्रतिदिन आहे.  

दूध संघ गायीच्या दुधाला २५ रुपये, तर म्हशीच्या दुधाला ३८ रुपये प्रतिलिटर असा दर देत आहे. संघाचे गायीचे दूध ३८ रुपये प्रतिलिटर आणि म्हशीचे दूध ५२ रुपये प्रतिलिटर या दरात जळगाव शहरात विक्रीसाठी उपलब्ध होत आहे. खासगी डेअऱ्यांकडूनही दूधपुरवठा वाढत असून, गुजरातमधील राज्य सहकारी दूध संघाचे अमूल दूधही जळगावात उपलब्ध झाले आहे. त्याची विक्री विविध वितरक, उपनगरांमधील दुकानांमधून सुरू झाली आहे. पुढे दिवाळीपर्यंत संकलन कमी होणार नाही, असे जाणकारांचे म्हणणे आहे.