परभणी ः दूध संकलनात सात लाख ८९ हजार लिटरने वाढ

परभणी ः शासकीय दूध योजनेअंतर्गंत परभणी दुग्धशाळेत यंदाच्या मार्च महिन्यात दररोज सरासरी ६४ हजार २१ लिटर याप्रमाणे एकूण १९ लाख ८४ हजार ६३६ लिटर दूध संकलन झाले आहे. गतवर्षीच्या (२०१८) मार्च महिन्याच्या तुलनेत यावर्षीच्या मार्च महिन्यातील दूध संकलनात ७ लाख ८९ हजार १४८ लिटरने वाढ झाली आहे. दूध संकलनात वाढ झाल्यामुळे पाश्चेरायझेशन प्रक्रियेसाठी यंत्रसामग्री अपुरी पडत आहे. सध्या दुग्धशाळेत परभणी, पाथरी, गंगाखेड येथील आणि हिंगोली जिल्ह्यातील दूध संकलन केले जात आहे.

नांदेड आणि गंगाखेड येथील शीतकरण केंद्रातील दूध उदगीर येथे पाठविले जात आहे. मार्च महिन्यात परभणी आणि हिंगोली जिल्ह्यातून प्रतिदिन सरासरी ६४ हजार २१ लिटर एवढे दूध संकलन झाले. गतवर्षी प्रतिदिन ३८ हजार ५६४ लिटर दूध संकलन झाले होते. 

गतवर्षी मार्च महिन्यात परभणी, हिंगोली, नांदेड या तीन जिल्ह्यांचे मिळून एकूण ११ लाख ९५ हजार ४८८ लिटर दूध संकलन झाले होते. यंदाच्या मार्च महिन्यात परभणी आणि हिंगोली या दोन जिल्ह्यातील एकूण १९ लाख ८४ हजार ६३६ लिटर एवढे दूध संकलन झाले. परभणी जिल्ह्यात पाथरी तालुक्यातील दूध संकलनामध्ये झालेली वाढ कायम आहे. त्यामुळे यंदा सकाळी आणि संध्याकाळी असे दोन वेळा दूध संकलन करावे लागत आहे. 

पाथरी येथील शीतकरण केंद्रावर सकाळी  ५ लाख २७ हजार ९३७ लिटर आणि संध्याकाळी २ लाख ७८ हजार २१४ लिटर असे एकूण ८ लाख ६ हजार १५१ लिटर दूध संकलन झाले. परभणी येथे म्हशीचे ३० हजार ५१५ लिटर आणि गायीचे ६ लाख ४५ हजार १४० लिटर असे एकूण ६ लाख ७५ हजार ६५५ लिटर दूध संकलन झाले. 

गंगाखेड येथे म्हशीचे ४७ हजार ९८९ लिटर आणि गायीचे २ लाख ९४ हजार २१२ लिटर असे एकूण ३ लाख ४२ हजार २०१ लिटर दूध संकलन झाले. हिंगोली जिल्ह्यातील म्हशीचे ३२ हजार ५५४ लिटर आणि गायीचे १ लाख २८ हजार ७५ लिटर दूध संकलन झाले.