गिरणा प्रोड्यूसर कंपनीचा टस्काबेरी कंपनीशी करार

देवळा, जि. नाशिक : तालुक्यातील गिरणा खोरे फार्मर्स प्रोड्यूसर कंपनी व बंगळूर स्थित टस्काबेरी कंपनी यांच्यात कांदा खरेदीसाठी साडेतीनशे कोटी रुपयांचा कृषी उद्यम संयुक्त व्यापार करार नुकताच झाला. त्यामुळे कांदा उत्पादक शेतकऱ्यांना हा करार मदतगार ठरणारा आहे. 

गिरणा खोरे कंपनीचे अध्यक्ष स्वप्नील पाटील व टस्काबेरीचे  कार्यकारी संचालक धनराज पाटील यांनी हा करार घोषित केला. यावेळी संचालक योगेश आहिरे, कृषी विभागाचे ‘आत्मा’चे महेश देवरे उपस्थित होते.

कसमादे भागात कांद्याचे उत्पादन मोठया प्रमाणात घेतले जाते. जे शेतकरी या कंपनीशी जोडले जातील, त्यांना कंपनीच्या माध्यमातून किसान क्रेडिट कार्ड उपलब्ध करून दिले जाणार आहे. पिकासाठी लागणारे बियाणे, खते, औषधे खरेदी करता येतील. यासह बांधावर ‘शेतकरी ते थेट ग्राहक’ अशी मालाची विक्री होईल. या कराराचे शेतकऱ्यांनी स्वागत करत दहा हजार शेतकरी या कंपनीशी जोडले गेले आहेत. 

पाटील यांनी कोरोनाकाळात १४ ते १५ कोटी रुपयांचा कांदा नाफेडकरिता खरेदी करत ‘महाओनियन अभियान’ यशस्वी केले. याची दखल घेत टस्काबेरी कंपनीने गिरणा खोरे प्रोड्यूसर कंपनीशी संपर्क करून करार केला. जिल्ह्यातील कांदा उत्पादन क्षेत्र असणारे सर्व शेतकरी यात सहभागी होऊ शकतात. यामुळे जवळपास दोन ते अडीच हजार लोकांना रोजगार मिळणार आहे. या करारानुसार कंपनी दररोज जवळपास २५० ते ३०० मेट्रिक टन कांदा खरेदी करणार आहे. 

बिनव्याजी एकरी २५ हजार रुपये

कांदा उत्पादन घेताना बियाणे, औषधे, खते व इतर काही बाबी घेण्यासाठी कंपनीशी जोडले गेलेल्या शेतकऱ्यांना उत्पादन खर्चासाठी बिनव्याजी एकरी २५ हजार रुपये मिळतील. ते किसान क्रेडिट खात्यात जमा करण्यात येतील. मात्र हे पैसे रोख स्वरूपात काढता येणार नाहीत. या कार्डच्या माध्यमातून संबंधित दुकानात कांदा उत्पादनासाठी लागणारे निविष्ठा बियाणे, खते, औषधे इत्यादी खरेदी करता येतील. त्यासाठी जिल्हाभर असे २० कृषी सेवा केंद्रे निर्मित होणार आहेत.