वळई, वडजलला बाजरी पीक भुईसपाट

कुकुडवाड, जि. सातारा  : माण तालुक्‍यात दुष्काळी स्थितीमुळे शेतकऱ्यांना शेतीतून कोणत्याही प्रकारचे उत्पादन काढता आले नव्हते. यंदा खरीप हंगामात सुरवातीस झालेल्या रिमझिम पावसावर शेतकऱ्यांनी कमी ओलीत पेरलेले बाजरीचे पीक ऐन बहरात असताना पावसामुळे भुईसपाट झाले आहे. 

शेतकऱ्यांनी पेरणी केलेले बाजरीचे पीक बहरात आले होते. ऐन भरात पीक जाणार असे वाटत होते. पण, उरमोडीचे पाणी सोडल्याने शेतकऱ्यांच्या आशा पल्लवित झाल्या. टपोरे दाणेदार पीक शेतात डोलत होते. या वर्षी पसा-कुडता होणार असे वाटत असताना अचानक आलेल्या पावसाने एका रात्रीत होत्याचे नव्हते करून ठेवले. उभे पीक भुईसपाट झाले. यामुळे ‘उरमोडीने तारले, पण निसर्गाने मारले’ अशी म्हणण्याची वेळ माण तालुक्‍यातील वळई, वडजल परिसरातील शेतकऱ्यांवर आली आहे. 

वळई येथील शेतकरी भगवान काळेल यांनी सांगितले की वळई, विरळी, चिलारवाडी परिसरांतील शेतकऱ्यांचे पावसामुळे शेतांसह घरांचे मोठ्या प्रमाणावर नुकसान झाले. वळई येथील बाजरी पिकाचे मोठ्या प्रमाणावर नुकसान झाले आहे. गावातील १५ विहिरी बुजल्या आहेत. कृषी विभागाचे सहा नाले आणि पाणी फाउंडेशनमधील पाच नाले फुटल्यामुळे शेतकऱ्यांच्या शेतीचे मोठे नुकसान झाले आहे. मात्र अधिकाऱ्यांकडून दखल घेतली गेलेली नाही. पंचनामे अजूनही झाले नाहीत. यामुळे शेतकरी चिंतातुर झाला आहे. पिकाची, शेतीची आणि घरांची नुकसानभरपाई मिळणार का, याची चिंता लागून राहिली आहे.