अडचणी सोडविण्याचा दूध उत्पादकांचा मानस

नाशिक : राज्यातील प्रगतशील दूध उत्पादकांची पहिली बैठक पुणे - सोलापूर रस्त्यावरील केडगाव चौफुला येथे नुकतीच झाली.  कमी दूध दर, दुष्काळी परिस्थिती, बँकांची दूध व्यवसायाबद्दलची अनास्था, उच्च प्रतीच्या वीर्यमात्राची उपलब्धता,  चाराव्यवस्थापन,  प्रजनन,  आरोग्य,  आहार शास्त्र,  स्वच्छ दूधनिर्मिती आदींवर या वेळी चर्चा झाली. या सर्व अडचणी सोडविण्यासाठी संघटितपणे एकत्र येण्याचा मानस दूध उत्पादकांनी व्यक्त केला.

जागतिक दर्जाची अवशेषमुक्त दूधनिर्मिती व पुरवठा ही प्रगतशील दूध उत्पादकांची नैतिक जबाबदारी आहे. यासाठी उत्तम नियोजन, आहार आणि निरोगी गाईचे संगोपन याबाबत सर्वोताेपरी मदत करण्याचे आश्वासन या वेळी देण्यात आले. 

दूध उत्पादकांनी या वेळी आपल्या अडचणी मांडल्या. डॉ. शैलेश मदने, डॉ. सावंत यांनी त्यांच्या विविध प्रश्नांचे निवारण केले. येत्या काळात संघटनेमार्फत मोठी ताकद निर्माण करून दूध उत्पादकांच्या विविध अडचणींवर गोठ्यात, प्रक्रिया, मार्केटिंग, शासन स्तरावर मोठे काम उभारण्याचा निर्धार उत्पादकांनी व्यक्त केला.