मुख्यमंत्री फडणवीस साधणार ‘लोक संवाद’ 

पुणे ः शासनाच्या विविध योजना गरजूंपर्यंत पोचल्यानंतर त्यातून होणारा लाभ, त्यात येणाऱ्या अडचणी आणि आवश्यक सुधारणा याची माहिती स्वतः मुख्यमंत्री देवेंद्र फडणवीस ‘लोक संवाद’ साधून जाणून घेणार आहेत. त्यासाठी या लाभार्थ्यांशी थेट संवाद साधण्याचा निर्णय मुख्यमंत्र्यांनी घेतला आहे. एक जानेवारी रोजी प्रधानमंत्री आवास योजनेच्या लाभार्थ्यांशी मुख्यमंत्री श्री. फडणवीस हे व्हिडिओ कॉन्फरन्सद्वारे थेट संवाद साधणार आहेत.

केंद्र आणि राज्य शासनाच्या विविध योजनांची राज्यात यशस्वीपणे अंमलबजावणी सुरू आहे. प्रधानमंत्री आवास योजना (नागरी व ग्रामीण), उन्नत शेती-समृद्ध शेतकरी योजना, छत्रपती शिवाजी महाराज शेतकरी सन्मान योजना, प्रधानमंत्री पीकविमा योजना, मागेल त्याला शेततळे, गाळमुक्त धरण गाळयुक्त शिवार, स्व. गोपीनाथ मुंडे शेतकरी अपघात विमा योजना, सूक्ष्म सिंचन आणि मृदा परीक्षणसारख्या योजना लाभार्थ्यांपर्यंत पोचण्यासाठी प्रयत्न सुरू आहेत. 

गेल्या काही दिवसांपासून मुख्यमंत्री देवेंद्र फडणवीस यांनी विविध जिल्ह्यांमध्ये आणि मंत्रालयातही या योजनांचा आढावा घेतला आहे. आता या विविध योजनांतील लाभार्थ्यांशी मुख्यमंत्री थेट संवाद साधणार असून, एक जानेवारी रोजी प्रधानमंत्री आवास योजनेच्या लाभार्थ्यांशी ‘लोक संवाद’ कार्यक्रमाद्वारे याचा प्रारंभ होणार आहे. मुख्यमंत्र्यांशी थेट संवाद साधण्याची इच्छा असणाऱ्या आणि प्रधानमंत्री आवास योजना व त्यासाठी राज्य शासनाने सुरू केलेल्या इतर पूरक योजना यांचा लाभ घेतलेल्या लाभार्थ्यांनी आपले नाव, संपर्क क्रमांक, पत्ता आणि योजनेचा लाभ घेतल्याची माहिती av.dgipr@maharashtra.gov.in या ईमेलवर आणि ८२९१५२८९५२ या व्हॉटसॲप क्रमांकावर २८ डिसेंबरपर्यंत पाठविण्याचे आवाहन माहिती व जनसंपर्क महासंचालनालयाने केले आहे.

पुणे जिल्ह्यातील इच्छुक लाभार्थी आपली माहिती ‘जिल्हा माहिती अधिकारी, नवीन मध्यवर्ती इमारत, तळमजला, ससून हॉस्पिटल कॉर्नर, पुणे ४११००१’ या पत्त्यावर किंवा diopune@gmail.com या मेलवर किंवा ९४२३२४५४५६ या क्रमांकावर २८ डिसेंबरपर्यंत माहिती पाठवण्याचे आवाहन केले आहे.