विधानसभा निवडणुकीसाठी मनसे १०० जागा लढविणार?

मुंबई : आगामी विधानसभा निवडणुकीत महाराष्ट्र नवनिर्माण सेना १०० ठिकाणी आपले उमेदवार उभे करणार असल्याची माहिती मनसेतील सूत्रांनी दिली. या संदर्भात महाराष्ट्र नवनिर्माण सेनेचे अध्यक्ष राज ठाकरे यांच्या घरी मनसे नेत्यांची बैठक झाली. त्यात हा निर्णय घेण्यात आल्याची माहिती समोर येत आहे. 

राज ठाकरे यांनी महाराष्ट्रातील सर्व विभाग प्रमुखांना इच्छूक उमेदवारांची यादी करण्याचे आदेश दिले होते. तसेच विधानसभेची तयारी कशी केली आहे, त्या प्रमाणे विजयी होण्याची शक्यता किती आहे याची चाचपणी करून माहिती तयार करण्यास सांगितली होती. त्यानुसार ही माहिती जमा झाली आणि त्या माहितीच्या आधारे एकूण १०० जागांवर निवडणूक लढविण्याच्या या बैठकीत निर्णय घेण्यात आला. 

मुंबई, पुणे, ठाणे, नाशिक, सोलापूर, पंढरपूर, खेड, हिंगोली या ठिकाणी मनसेचा प्रभाव आहे. त्यामुळे या भागात आपले उमेदवार देण्यावर या बैठकीत शिक्कामोर्तब करण्यात आला आहे. या संदर्भात राज ठाकरे येत्या १ ते २ दिवसात आपला निर्णय जाहीर करण्याची शक्यता आहे. 

या बैठकीनंतर राज ठाकरेंनी काही नेत्यांना पुणे व नाशिक येथे रवानाही केले आहे. हे नेते या ठिकाणी इच्छूकांच्या मुलाखती घेऊन त्यांची किती तयारी आहे. तसेच या ठिकाणी विजयाची किती शक्यता आहे याची चाचपणी करणार आहे.