खानदेशात मध्यम पाऊस; नंदुरबारला हुलकावणी

जळगाव : खानदेशात शुक्रवारी (ता.२१) मध्यरात्री व शनिवारी (ता.२२) सकाळी अनेक ठिकाणी हलका ते मध्यम स्वरुपाचा पाऊस झाला. नंदुरबारात मात्र पावसाने हुलकावणी दिली. पाऊस झालेल्या भागातील कोरडवाहू कापूस, ताग या पिकांना लाभ झाला आहे. पुढे रब्बीसाठीदेखील पोषक वातावरण असेल, असे शेतकऱ्यांनी म्हटले आहे.

जळगावात शुक्रवारी रात्री काही वेळ जोरदार पाऊस झाला. मग मध्येच पाऊस बंद झाला. मध्यरात्रीपासून सकाळपर्यंत भिज पाऊस सुरू होता. नदी, नाल्यांना कुठेही पूर आला नाही. नंदुरबार जिल्ह्यात मात्र शुक्रवारी रात्री व शनिवारी सकाळपर्यंत पाऊस नव्हता. फक्त ढगाळ वातावरण कायम होते. धडगाव व अक्कलकुवा येथे काही पाड्यांवर तुरळक पाऊस झाला. शहादा, तळोदा, नवापुरात मात्र पाऊसच आला नाही.

पूर्वहंगामी कापसाचे नुकसान पूर्वहंगामी कापसात उमललेली बोंडे ओली होऊन त्यांचे नुकसान झाल्याची माहिती जळगाव, चोपडा, यावल भागातून मिळत आहे. या कापसाचा दर्जा घसरेल. तसेच तो वेचणीसाठीदेखील सुकर जाणार नाही. पाऊस सुरूच राहिल्यास कापूस काळवंडून १०० टक्के नुकसान होईल, असे सांगण्यात आले.

कोरडवाहू कापूस, उशिरा पेरलेली ज्वारी, ताग या पिकांना या पावसाचा लाभ होणार आहे. रब्बी हंगामाच्या पेरणीसाठीदेखील वाफसा मिळेल. आणखी पाऊस आला तर रब्बीची पेरणी १०० टक्के साध्य होऊ शकते, असे शेतकऱ्यांनी सांगितले.

पावसाची आकडेवारी (मिलिमीटरमध्ये) जळगाव ११, चोपडा ७, यावल ९, रावेर ७, पाचोरा ६, पारोळा ८, अमळनेर ९, एरंडोल ८, धरणगाव ११, भुसावळ ६, जामनेर ६, चाळीसगाव ७, भडगाव ८. धुळे जिल्हा - धुळे ६, शिरपूर ५, शिंदखेडा ८. शिरपूर, मुक्ताईनगर, बोदवड या भागातील पावसाची आकडेवारी मिळू शकली नाही.