‘कादवा’चे आधुनिकीकरण, इथेनॉल प्रकल्प होणार

चिंचखेड, जि. नाशिक : नाशिक जिल्ह्यात सहकारी तत्त्वावर सुरू असलेल्या एकमेव कादवा सहकारी साखर कारखान्याचे विस्तारीकरण, आधुनिकीकरण, इथेनॉल प्रकल्प, टप्प्याटप्प्यात एफआरपी देणे आदी विषयांना वार्षिक सर्वसाधारण सभेत मंजुरी मिळाली.

सभेच्या अध्यक्षस्थानी ‘कादवा’चे अध्यक्ष श्रीराम शेटे होते. या वेळी उपाध्यक्ष उत्तम भालेराव, खासदार हरिश्चंद्र चव्हाण, आमदार नरहरी झिरवाळ, माजी आमदार धनराज महाले, शिरीष कोतवाल, जिल्हा बँक संचालक गणपतराव पाटील, बाजार समिती सभापती दत्तात्रेय पाटील, सुरेश डोखळे, जिल्हाप्रमुख भाऊलाल तांबडे आदी उपस्थित होते.

सर्व गटांतून सर्वाधिक ऊस पुरवठा आणि विविध प्रकारांत अधिक ऊस उत्पादन करणाऱ्या ऊस उत्पादकांचा सत्कार करण्यात आला. या वेळी शेटे म्हणाले, ‘‘अनेक कारखाने एफआरपी देऊ शकले नसताना, उपपदार्थांची निर्मिती नसताना सर्वाधिक भाव व वेळेत एफआरपी दिली आहे. कारखान्याची आर्थिक स्थिती मजबूत आहे

आधुनिकीकरणाचे ८० टक्के काम पूर्ण झाले आहे. बॉयलर, टर्बाइन व मिल टाकणे बाकी आहे. त्यानंतर २५०० मेटन क्षमतेने गाळप करणे शक्य होणार आहे. शासनाने इथेनॉल प्रकल्पाला चालना दिली असून, त्या दृष्टीने वाटचाल करणे आवश्यक आहे.

 बँक उचल देईल त्याप्रमाणे पहिला हप्ता जास्तीत जास्त देऊन उर्वरित दोन टप्प्यांत देण्याचा विचार आहे. एफआरपीमधून कोणतीही कपात केली जाणार नाही. मात्र कारखान्याला त्याव्यतिरिक्त अतिरिक्त भाव देता आला तरच भागविकास निधी कापला जाईल. कोणाचेही शेअर्स रद्द होणार नाहीत. परंतु सर्वांनी शेअर्स पूर्ण करावे. सर्व सभासदांनी ऊस लावावा, असे अवाहन शेटे यांनी केले.गाळप पुरेसे होत नसताना हे प्रकल्प हिताचे ठरणार नाहीत, असे सांगून नरेंद्र जाधव, सचिन बर्डे यांनी हरकत घेतली. गाळप वाढल्यानंतरच या प्रकल्पांचा विचार व्हावा, अशी भूमिका घेतली.

माजी संचालक जे. डी. केदार, तानाजी माळी यांनी इथेनॉल प्रकल्प शेतकरी हिताचा असल्याचे सांगून त्यास सर्वांनी साथ देण्याची अपेक्षा व्यक्त केली. शिवसेनेचे जिल्हाउपप्रमुख अरुण वाळके यांच्यासह बहुतांश सभासदांनी  इथेनॉल प्रकल्पास पाठिंबा दिला. पप्पू मोरे यांनी वेळेत ऊस तोडणी करण्याची मागणी केली.