हिंगोलीत ‘कर्जमुक्ती’तून ७० हजार खात्यांवर रक्कम हस्तांतरित

हिंगोली : महात्मा जोतिराव फुले शेतकरी कर्जमुक्ती योजनेअंतर्गत जिल्ह्यात आजवर ७० हजार ५०१ शेतकऱ्यांच्या खात्यावर ४७९ कोटी ३९ लाख रुपये एवढी रक्कम हस्तांतरित करण्यात आली. १० हजार ६४७ शेतकऱ्यांचे आधार प्रमाणिकरण राहिले आहे.

कर्जमाफीच्या लाभासाठी संबंधित शेतकऱ्यांनी विलंब न लावता आधार प्रमाणिकरण करुन घ्यावे, असे आवाहन जिल्हा उपनिबंधक (सहकारी संस्था) सुधीर मेत्रेवार यांनी केले.

या योजनेअंतर्गंत जिल्ह्यातील ९८ हजार ३९९ शेतकऱ्यांची कर्जखाती पोर्टलवर अपलोड करण्यात आली आहेत. चौथ्या यादी अखेर एकूण ८७ हजार ४८१ शेतकऱ्यांना विशिष्ट क्रमांक प्राप्त झाला. त्यापैकी ७६ हजार ८३४ शेतकऱ्यांनी आधार प्रमाणिकरण करुन घेतले आहे. एकूण १ हजार ५८३ शेतकऱ्यांच्या तक्रारी आल्या आहेत. त्यापैकी जिल्हा स्तरीय समितीकड़ून ७३६, तर तालुका स्तरीय समितीकडून ४७३ तक्रारींचे निराकरण करण्यात आले. तर, २७४ तक्रारी प्रलंबित आहेत. 

जिल्ह्यातील १० हजार ६४७ शेतकऱ्यांचे आधार प्रमाणिकरण बाकी आहे. त्यांनी जवळच्या जनसुविधा केंद्रांवर किंवा त्यांच्या संबंधित बँक शाखेस तात्काळ संपर्क करुन त्यांचे आधार प्रमाणिकरण करुन घ्यावे. त्यामुळे सर्व पात्र शेतकऱ्यांना या योजनेचा लाभ देणे शक्य होईल. पात्र, शेतकरी यंदाच्या खरीप हंगामात पीक कर्ज घेण्यासाठी पात्र ठरतील. त्यामुळे तत्काळ आधार प्रमाणिकरण करुन घ्यावे, असे आवाहन मेत्रेवार यांनी केले.