मॉन्सूनची दक्षिण कर्नाटकपर्यंत चाल

पुणे : अरबी समुद्रातील ‘वायू’ चक्रीवादळामुळे थांबलेला नैर्ऋत्य मोसमी वाऱ्यांचा (मॉन्सून) उत्तरेकडील प्रवास सुरू झाला आहे. शुक्रवारी (ता. १४) मॉन्सून केरळचा उर्वरीत भाग व्यापून दक्षिण कर्नाटकात दाखल झाला आहे. मॉन्सूनने कर्नाटकातील मंगळूरू, मैसूरपर्यंत मजल मारली आहे, तर तामिळनाडूतील सालेम, कुड्डालोरपर्यंत प्रगती आहे. ईशान्य भारतातील आणखी काही भागात वाटचाल करताना अगरताळापर्यंत मॉन्सून पोचल्याचे हवामान विभागाने म्हटले आहे. मॉन्सूनची वाटचाल खूपच अडखळत सुरू आहे. आगमनास प्रतिकूल स्थिती असल्याने यंदा केरळात नियमित वेळेच्या तब्बल आठवडाभर उशिराने मॉन्सून केरळात डेरेदाखल झाला. शनिवारी (ता. ८) केरळच्या कोचीसह तमिळनाडूच्या मदुराईपर्यंतची मजल मारली. दोन दिवसांत किनाऱ्यावर आणखी प्रगती करत कन्नूरपर्यंतचा टप्पा पूर्ण केला होता. त्यानंतर सोमवारी (ता. १०) केरळचा बहुतांशी भाग व्यापला होता. मॉन्सून साधारणतः १३ जूनपर्यंत महाराष्ट्रात पोचण्याची शक्यता असतानाच अरबी समुद्रात वायू वादळाची निर्मिती झाली. चक्रीवादळामुळे मॉन्सूनची वाटचाल प्रभावित झाली. तसेच समुद्रावरील बाष्प ओढून घेतल्याने मॉन्सूनचे राज्यातील आगमनही लांबले आहे. ‘वायू’ चक्रीवादळाची तीव्रता कमी होत असल्याने मॉन्सूनच्या प्रगतीस पोषक वातावरण तयार होऊ लागले आहे.