मॉन्सून गोव्याच्या उंबरठ्यावर दाखल

पुणे: नैर्ऋत्य मोसमी वाऱ्यांनी (मॉन्सून) शनिवारी (ता.६) दक्षिण कर्नाटक आणि तामिळनाडूच्या आणखी काही भागात प्रगती केल्याचे हवामान विभागाने जाहीर केले आहे. गुरूवारी (ता.४) पश्चिम किनारपट्टीवर वाटचाल करत, संपूर्ण केरळ व्यापला आहे. कर्नाटक राज्याची संपूर्ण किनारपट्टी व्यापून मॉन्सून वारे गोव्याच्या उंबरठ्यावर दाखल झाले आहे. आज दक्षिण कर्नाटकात वारे दाखल झाले असले तरी पश्‍चिम किनारपट्टीवरील वाटचाल जैसे थे आहे.   अरबी समुद्रात असलेल्या ‘निसर्ग’ चक्रीवादळामुळे मॉन्सून वाऱ्यांचे प्रवाह प्रभावित होऊन १ जून रोजी केरळमध्ये दाखल झाला आहे. देशाच्या मुख्य भूमीवर आगमन होताच, गुरुवारी (ता.४) केरळचा कोमोरीनचा सर्व भाग, श्रीलंका व दक्षिण बंगालच्या उपसागराचा आणखी काही भाग, कर्नाटक किनारपट्टीवरील कारवार, हसनपर्यंत आणि मध्य अरबी समुद्राच्या काही भागात मॉन्सून दाखल झाले. शनिवारी दक्षिण अंतर्गत कर्नाटक, तामिळनाडूच्या सालेमपर्यंत मजल मारली असल्याचे हवामान विभागाने म्हटले आहे.     ‘निसर्ग’मुळे मॉन्सून वाऱ्यांवर प्रभाव पडल्याने पश्चिम किनारपट्टीवर मॉन्सूनने प्रगती केली. कर्नाटक तामिळनाडूच्या अंतर्गत भागात मात्र मॉन्सून दाखल झालेला नव्हता. वादळ जमिनीवर येऊन निवळल्यानंतर वाऱ्याचे प्रवाह सुरळीत होऊ लागले असून, शनिवारी कर्नाटक, तामिळनाडूच्या अंतर्गत भागासह बंगालच्या उपसागराच्या आणखी काही भागात वाटचाल केली आहे. सोमवारपर्यंत तमिळनाडूच्या उर्वरित भागासह, कर्नाटक, आंध्र प्रदेश आणि बंगालच्या उपसागराच्या आणखी काही भागात मॉन्सून दाखल होण्याची शक्यता आहे.

बंगालच्या उपसागरात कमी दाबाचे संकेत बंगालच्या उपसागरात आलेले ‘अम्फान’ चक्रीवादळापाठोपाठ अरबी समुद्रात ‘निसर्ग’ चक्रीवादळाची निर्मिती झाली. आता निसर्ग चक्रीवादळ निवळते तोच बंगालच्या उपसागरात कमी दाब क्षेत्राची निर्मिती होण्याचे संकेत आहे. उद्या (ता.८) उपसागराच्या पूर्वमध्य भागात कमी दाबाचे क्षेत्र तयार होणार असून, त्याची तीव्रता वाढण्याची अंदाज आहे. यामुळे मॉन्सूनच्या वाटचालीवरही परिणाम होण्याची शक्यता वर्तविण्यात आली आहे.