मॉन्सूनची वाटचाल सुरूच 

पुणे : उत्तर भारतात मॉन्सून दाखल झाल्यानंतर वाटचाल सुरूच आहे. शनिवारी (ता. १२) मॉन्सूनने बंगालचा उपसागर, ओडिशाचा काही भाग, पश्‍चिम बंगाल, झारखंड आणि बिहारच्या काही भागांत प्रगती केली आहे. आज (ता.१२) मॉन्सून उत्तर भारतातील काही राज्यांत प्रगती करण्याची शक्यता हवामान विभागाने वर्तविली आहे. 

राज्य व्यापल्यानंतर मॉन्सूनने उत्तरेकडे कूच केली आहे. या भागात मॉन्सून वेगाने पुढे सरकत आहे. गुजरात, मध्य प्रदेश, छत्तीसगड या भागात मॉन्सूनने शनिवारी फारशी प्रगती केली नाही. मात्र बंगालचा उपसागर व ईशान्येकडील राज्यात मॉन्सूनने बऱ्यापैकी प्रगती केली आहे. त्यामुळे मॉन्सूनने दीव, सुरत, नंदुरबार, राइसेन दामोह, उमराई, पेढ्रा रोड, बोलांगीर, भुवनेश्‍वर, बारीपाडा, पुरुलिया, धनबाद, दारबंगापर्यंत मजल मारली आहे. मॉन्सूनला पुढे सरकण्यासाठी आणखी पोषक वातावरण आहे. त्यामुळे आणखी काही भागांत दाखल होण्याचे संकेत आहेत. 

सध्या ओडिशा, पश्‍चिम बंगाल ते बंगाल उपसागराच्या ईशान्य भागापर्यंत कमी दाबाचे क्षेत्र सक्रिय झालेले आहे. पुढील तीन ते चार दिवसांत या भागात मॉन्सून आणखी पुढे सरकण्याची शक्यता आहे. उत्तर भारतात मॉन्सून सरकत असताना पावसाने चांगलीच हजेरी लावली असून, अनेक भागांत मेघगर्जना व विजांच्या कडकडाटासह मुसळधार पाऊस पडत आहे. उत्तरेकडे मॉन्सून गेल्यानंतर राज्यातील काही भागांत मॉन्सून चांगलाच सक्रिय झाल्याने राज्यातही जोरदार ते मुसळधार पाऊस कोसळत आहे.