प्रवाह सुरळीत झाल्यानंतर मॉन्सूनची वाटचाल...

पुणे : नैर्ऋत्य मोसमी वारे (मॉन्सून) सोमवारी (ता.१) देवभुमी केरळमध्ये दाखल झाले. मात्र त्यानंतर बुधवारी (ता.३) वाऱ्यांनी आणखी वाटचाल केली नाही. अरबी समुद्रातील ‘निसर्ग’ चक्रीवादळामुळे प्रभावित झालेले प्रवाह सुरळीत झाल्यानंतर मॉन्सूनची कर्नाटकसह महाराष्ट्राकडे वाटचाल सुरू होणार असल्याचे हवामान विभागाच्या सुत्रांनी सांगितले.  अरबी समुद्रात असलेल्या ‘निसर्ग’ चक्रीवादळामुळे वाऱ्यांना खेचून आणल्याने मॉन्सून नियमित वेळेवर १ जून रोजी केरळमध्ये दाखल झाला आहे. मॉन्सूनने सोमवारी (ता.१) केरळच्या कन्नूर, तामिळनाडूच्या कोईंबतूर, कन्याकुमारीपर्यंतचा भाग व्यापला. चक्रीवादळ उत्तरेकडे सरकत जाताना किनारपट्टीलगत मॉन्सूनची आणखी वाटचाल होण्याची शक्यता होती. केरळ, कोमोरीनचा संपूर्ण भाग, तामिळनाडूचा आणखी काही भाग, पदुच्चेरीसह आणखी काही भागात मॉन्सून दाखल होण्यास पोषक हवामान असल्याचे हवामान विभागाने स्पष्ट केले होते. मात्र ‘निसर्ग’मुळे मॉन्सून वाऱ्यांवर प्रभाव पडला असून, बुधवारी (ता. ३) मॉन्सूनची वाटचाल ‘जैसे थे’ होती.  दरम्यान अरबी समुद्रवरूनही मॉन्सूनची वाटचाल पुन्हा रेंगाळली आहे. ‘अम्फान’ चक्रीवादळामुळे बंगालच्या उपसागरात १७ मे रोजी मॉन्सून दाखल झाला. वादळ उत्तरेकडे सरकून, बाष्प आढून नेल्याने मॉन्सूनची वाटचाल थांबली. २७ मे रोजी मॉन्सूनने पुढे चाल केली. २८ मे रोजी संपुर्ण अंदमान बेटांसह बंगालच्या उपसागरात प्रगती केल्यानंतर पुढील वाटचाल पुन्हा अडखळली आहे. सोमवारी (ता.१) श्रीलंकेसह, दक्षिण बंगालच्या उपसागराच्या काही भागात मॉन्सून दाखल झाला. त्यानंतर पुन्हा मॉन्सूनच्या प्रगतीला ‘ब्रेक’ लागला आहे, चक्रीवादळ निवळल्यानंतर मॉन्सूनची कर्नाटक, महाराष्ट्राकडे वाटचाल सुरू होणार आहे.