मॉन्सून मंगळवारपर्यंत उत्तर अंदमानापर्यंत पोचण्यास पोषक हवामान

पुणे: नैॡत्य मोसमी वारे (मॉन्सून) शनिवारी (ता. १८) अंदमानात दाखल झाले आहेत. मोसमी वाऱ्यांनी दक्षिण अंदमान समुद्र आणि निकोबार बेटे, दक्षिण बंगालच्या उपसागराचा काही भाग व्यापल्याचे हवामान विभागाने जाहीर केले. मंगळवारपर्यंत (ता. २१) उत्तर अंदमानापर्यंत मॉन्सूनची प्रगती होण्यास पोषक हवामान आहे. तर केरळात ६ जूनपर्यंत मॉन्सून दाखल होण्याचे पूर्वानुमान आहे. हवामान विभागाने १८ ते १९ मेपर्यंत मॉन्सून अंदमानात येण्याचा अंदाज वर्तविलेला होता. अंदाजानुसार सर्वासाधारण आगमनाच्या (ता. २०) दोन दिवस अगोदर शनिवारी (ता. १८) मॉन्सून अंदमानात दाखल झाला आहे. विषुववृत्ताकडून येणाऱ्या जोरदार वाऱ्यांचे प्रवाह, ढगाळ हवामान आणि ४८ तासांपासून पडणारा पाऊस या निरीक्षणांवरून दक्षिण अंदमान समुद्र, दक्षिण बंगालचा उपसागर आणि निकोबार बेटांवर मॉन्सूनने प्रगती केली आहे.  तर बंगालच्या उपसागराचा आणखी काही भाग, उत्तर अंदमान बेटांवर मॉन्सून पोचण्याची पोषक स्थिती आहे. तर २१ व २२ मे पर्यंत या भागात हलक्या पावसाची शक्यता आहे. दरम्यान गतवर्षी (२०१८) २५ मे रोजी अंदमानात दाखल झालेल्या मॉन्सूनने सर्वसाधारण वेळेपेक्षा दोन दिवस आधीच २९ मे रोजी केरळात धडक दिली होती. तर ८ जून रोजी मॉन्सून महाराष्ट्रात दाखल झाला होता. केरळमध्ये यंदा ६ जूनपर्यंत मॉन्सून दाखल होणार असून, वाऱ्याचे आगमन चार दिवस मागे पुढे होण्याचे संकेत हवामान विभागाने दिले आहेत. तर केरळमध्ये दाखल झाल्यानंतर मॉन्सूनची पुढील वाटचाल निश्चित होणार आहे.