मॉन्सून एक्सप्रेसची गती मंदावली; गुरुवारपर्यंत उत्तर अंदमानात

पुणे : नैऋत्य मोसमी वाऱ्यांनी (मॉन्सून) शनिवारी (ता. १८) दक्षिण अंदमान समुद्र आणि निकोबार बेटे, दक्षिण बंगालच्या उपसागराचा काही भाग व्यापला. मंगळवारपर्यंत (ता. २१) उत्तर अंदमानपर्यंत मॉन्सूनची वाटचाल होण्याचा अंदाज होता. मात्र, मॉन्सूनची अंदमानातील प्रगती काहीशी मंदावली असून, गुरुवारपर्यंत (ता. २३) मॉन्सून उत्तर अंदमानात पोचण्याचे संकेत हवामान विभागाने दिले आहेत.  हवामान विभागाने १८ ते १९ मेपर्यंत मॉन्सून अंदमानात दाखल होण्याचा अंदाज वर्तविलेला होता. अंदाजानुसार सर्वासाधारण आगमनाच्या (ता. २०) दोन दिवस अगोदर शनिवारी (ता. १८) मॉन्सून अंदमानात पोचला आहे. मंगळवारपर्यंत बंगालच्या उपसागराचा आणखी काही भाग, उत्तर अंदमान बेटांवर मॉन्सून पोचण्याची पोषक स्थिती असल्याचेही हवामान विभागाने यापूर्वी स्पष्ट केले होते. सोमवारी अगमनानंतरच्या तिसऱ्या दिवशी मॉन्सूनची अंदमानातील वाटचाल जैसे थे असल्याचे सांगण्यात आले.  गुरुवारपर्यंत प्रगती शक्य सोमवारी (ता. २०) मॉन्सून गुरुवारपर्यंत (ता. २३) अंदमानात प्रगती करेल, असे जाहीर करण्यात आले. सोमवारी दुपारी बंगालच्या उपसागरात ढग गोळा होत होते. तर, अंदमान बेटांवर अंशत: ढगाळ हवामान होते. यंदा ६ जूनपर्यंत मॉन्सून केरळमध्ये दाखल होण्याचे, यात आगमन चार दिवस मागे-पुढे होण्याचे संकेत हवामान विभागाने दिले आहेत. तर, केरळमध्ये दाखल झाल्यानंतर मॉन्सूनची पुढील वाटचाल निश्चित होणार आहे.