मॉन्सूनचा मुक्काम लांबणार

मॉन्सूनचा मुक्काम लांबणार
मॉन्सूनचा मुक्काम लांबणार

पुणे : निम्मा सप्टेंबर उलटूनही परतीच्या प्रवासासाठी पोषक हवामान नसल्याने यंदाही नैऋत्य मोसमी वाऱ्यांचा (मॉन्सून) देशातील मुक्काम लांबण्याची शक्यता आहे. दीर्घकालीन सर्वसाधारण वेळेनुसार १ सप्टेंबर रोजी पश्चिम राजस्थानमधून मॉन्सूनचा परतीचा प्रवास सुरू होतो. गतवर्षी (२०१८) २९ सप्टेंबर रोजी, तर २०१५ मध्ये ४ सप्टेंबर रोजी मॉन्सूनने परतीचा प्रवास सुरू केला होता. यंदाच्या हंगामात अद्यापही पश्चिम राजस्थानमधून मॉन्सून माघारी फिरलेला नाही. हवामान विभागाच्या पुणे केंद्राचे प्रमुख डॉ. अनुपम कश्यपी म्हणाले की, मॉन्सूनच्या परतीच्या प्रवासाची घोषणा करण्यासाठी सलग पाच दिवस पावसाची उघडीप असणे, हवेतील बाष्पाचे प्रमाण कमी होणे, हवेचा खालच्या थरात केंद्रभागी दाब अधिक असलेली चक्राकार वाऱ्यांची स्थिती (अँटी सायक्लोनिक सर्क्युलेशन) निर्माण होणे आवश्यक असते.   पश्चिम राजस्थानमध्ये अद्यपाही अधूनमधून पाऊस पडत आहे. सकाळच्या वेळी बाष्पाचे प्रमाण ७० ते ८० टक्क्यांवर जात असल्याचे दिसून येत आहे. शिवाय या भागात पुढील पाच दिवसात पावसाचा अंदाज आहे. जवळपास आठवडाभर हीच स्थिती कायम राहण्याचे संकेत असून, तोपर्यंत मॉन्सून माघारी फिरण्याची शक्यता नाही.  दरम्यान, मॉन्सूनचे लांबलेले आगमन हे यंदाच्या हंगामाचे आणखी एक वैशिष्ट्य ठरले. सुरवातीपासूनच मॉन्सूनची वाटचाल अडखळत झाली. १८ मे रोजी अंदमानात पोचलेल्या मॉन्सूनचा पुढील प्रवास लांबला. देवभूमी केरळात तब्बल आठवडाभर उशीराने ८ जून रोजी मॉन्सून दाखल झाला. अरबी समुद्रात तयार झालेल्या अतितीव्र ‘वायू’ चक्रीवादळाने मॉन्सूनची वाटचाल रोखून धरली. त्यामुळे वाऱ्याचा वेग मंदावलाच, तसेच बाष्प ओढून नेल्याने पाऊसही लांबला. साधारणत: ७ जूनपर्यंत तळ कोकणात पोचणारा मॉन्सून, यंदा २० जून रोजी तळकोकणात पोचला. तसेच २५ जून रोजी वाऱ्यांनी राज्य व्यापले. त्यांनतर मजल दरमजल करत दीर्घकालीन सर्वसाधारण वेळेच्या पाच दिवस उशिराने म्हणजेच १९ जुनै रोजी मॉन्सूनने देश व्यापला. सध्या संपूर्ण देशात मॉन्सूनचे अस्तित्व असून, परतीचा प्रवासाची सुरवात आणखी लांबण्याची शक्यता आहे. 

वर्ष तारीख
२०१३ ९ सप्टेंबर
२०१४ २३ सप्टेंबर
२०१५ ४ सप्टेंबर
२०१६ १५ सप्टेंबर
२०१७ २७ सप्टेंबर
२०१८ २९ सप्टेंबर

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com