जगभरातील बाधितांची संख्या १५ लाखांवर

न्यूयॉर्क : जगभरातील १९२ देशांमध्ये फैलाव झालेल्या कोरोना विषाणूमुळे जगभरात संसर्गग्रस्तांची संख्या १५ लाखांवर गेली असून बळींचा आकडाही ९० हजारांच्या जवळ जाऊन ठेपला आहे. एकूण बाधितांपैकी निम्मे बाधित युरोपमध्ये आहेत.  जगभरात कोरोनाग्रस्तांची संख्या वेगाने वाढत आहे. अनेक देशांमध्ये रुग्णांची चाचणी घेण्याची पुरेशी यंत्रणा नसल्याने आणि लोकही स्वतःहून पुढे येत नसल्याने जाहीर होणाऱ्या बाधितांच्या संख्येपेक्षा कितीतरी अधिक जण बाधित असण्याची शक्यता जागतिक आरोग्य संघटनेने व्यक्त केली आहे. कोरोनामुळे इटलीत आत्तापर्यंत अठरा हजार जणांचा मृत्यू झाला असून हा देश याबाबतीत अजूनही सर्वांत पुढे आहे. येथे बाधितांची संख्याही १.३९ लाख आहे.  काळजी वाटावी या वेगाने रुग्ण वाढणाऱ्या अमेरिकेत ४.३० लाख बाधित असून मृतांच्या संख्येने १५ हजारांचा टप्पा ओलांडला आहे. ही संख्या स्पेनमधील मृतांच्या संख्येपेक्षा अधिक आहे. तिथे १५ हजारांच्या आसपास लोक मृत झाले आहेत. रुग्ण आणि मृत व्यक्ती यांचे प्रमाण पाहता इटलीतील परिस्थिती अद्यापही गंभीर असल्याचे दिसत आहे. जगभरातील एकूण मृतांपैकी तीन चतुर्थांश मृत्यू फक्त युरोपमध्ये झाले आहेत.