राज्यात एक कोटीहून अधिक ‘जमीन आरोग्यपत्रिका’धारक'

मुंबई : शेतकऱ्यांना जमिनीचा पोत कळावा, यासाठी सुरू करण्यात आलेल्या योजनेअंतर्गत देशात १२ कोटींहून अधिक ‘जमीन आरोग्य पत्रिका’चे वितरण करण्यात आले आहे. महाराष्ट्रात आत्तापर्यंत एक कोटीहून अधिक शेतकऱ्यांना १ कोटी ६३ लाख ‘जमीन आरोग्य पत्रिका’चे वितरण करण्यात आले आहे. मृदा आरोग्य कार्ड वितरित करण्यात उत्तर प्रदेश देशात प्रथम स्थानावर तर महाराष्ट्र दुसऱ्या स्थानावर आहे. मध्यप्रदेश तिसऱ्या स्थानावर आहे. फेब्रुवारी २०१५ सालापासून देशात जमीन आरोग्य पत्रिका ही योजना सुरू करण्यात आली. शेतजमिनीचे आरोग्य कळावे व त्यानुसार पीकपद्धती शेतकऱ्यांनी राबवावी, या उद्देशाने ही योजना अस्तित्वात आली. जमीन आरोग्य पत्रिका योजनेतंर्गत नगर जिल्ह्यात ११ लाख १६ हजार शेतकऱ्यांना १० लाख ११ हजार जमीन आरोग्य पत्रिका वितरित करण्यात आले आहेत. नाशिक जिल्हा दुसऱ्या स्थानावर असून या जिल्ह्यातील ७ लाख शेतकऱ्यांना ६ लाख २८ हजार जमीन आरोग्य पत्रिकाचे वितरण करण्यात आले आहे. बुलडाणा जिल्ह्यात ८ लाख १३ हजार शेतकऱ्यांनी या योजनेत सहभाग नोंदविला असून, ६ लाख १७ हजार जमीन आरोग्य पत्रिकेचे वितरण झाले आहे. योजनेत कोल्हापूर जिल्हा चौथ्या स्थानावर असून या जिल्ह्यात ५ लाख १७ हजार जमीन आरोग्य पत्रिका वितरित झाले असून जिल्ह्यातील ६ लाख ४९ हजार शेतकऱ्यांना कार्डचे वितरण करण्यात अाले अाहे. योजनेत पुणे जिल्हा पाचव्या स्थानावर असून या जिल्ह्यातील ६ लाख ८८ हजार शेतकऱ्यांना ४ लाख ६३ हजार कार्ड वितरित करण्यात आले आहेत. औरंगाबाद जिल्हा सहाव्या स्थानावर असून जिल्ह्यातील ६ लाख १९ हजार शेतकऱ्यांना ४ लाख ४० हजार कार्डाचे वितरण करण्यात आले आहे.  देशात १२ कोटींहून अधिक जमीन आरोग्यपत्रिका फेब्रुवारी २०१५ ते एप्रिल २०१८ या कालावधीत जमीन आरोग्य पत्रिका (सॉइल हेल्थ कार्ड) योजनेचा देशातील १० कोटी ८० लाख शेतकऱ्यांनी लाभ घेतला आहे. या कालावधीत ३ कोटी ५० लाख मातीचे नमुने तपासण्यात आले तर १२ कोटी ४६ लाख जमीन आरोग्य पत्रिकेचे वितरण करण्यात आले आहे.