हळदीत जास्त पाण्याचा निचरा अावश्यक ः प्रा. ओळंबे

पांगरा शिंदे, जि. हिंगोली  ः सद्यःस्थितीत हळदीच्या पिकांमध्ये पाणी साचून राहू देऊ नये. जास्तीच्या पाण्याचा निचरा करण्यासाठी तत्काळ उपाय योजना कराव्यात, असा सल्ला तोंडापूर (ता. कळमनुरी) येथील कृषी विज्ञान केंद्रांचे विषय विशेष तज्ज्ञ प्रा. अनिल ओळंबे यांनी केले.

‘अॅग्रोवन’ आणि ‘महाधन’ यांच्या तर्फे हळद पीक व्यवस्थापन या विषयावर पांगरा शिंदे (ता. वसमत) येथे आयोजित अॅग्रोवन संवाद चर्चासत्रामध्ये प्रा. ओळंबे बोलत होते. या वेळी महाधनचे अनिल अनघुले, साहेबराव शिंदे, माणिकराव शिंदे, त्र्यंबक शिंदे, रमेश चेंडके आदी उपस्थित होते.

प्रा. ओळंबे पुढे म्हणाले, की हळदीचे पीक तणमुक्त ठेवावे. पिकाला मातीची भर द्यावी कंदमाशी, करपा रोगाचा प्रादुर्भाव टाळण्यासाठी शिफारशीत कीटकनाशके, बुरशीनाशकांची फवारणी करावी. या वेळी श्री. अनभुले यांनी महाधनच्या खतांविषयी माहिती दिली. ‘अग्रोवन’चे वितरण प्रतिनिधी संतोष जवळे यांनी सूत्रसंचालन केले. या वेळी शेतकरी मोठ्या संख्येने उपस्थित होते.