गडहिंग्लजमध्ये यंदा अधिक पाणीसाठा

गडहिंग्लज, जि. कोल्हापूर : गतवर्षीच्या ऑगस्ट महिन्यातील अतिवृष्टीमुळे तालुक्यात पाण्यासाठी चांगले दिवस आहेत. हिरण्यकेशी नदीसह तालुक्‍यातील विविध तलावांमधील पाण्यालाही अजून तरी उपसाबंदी लागू केलेली नाही. तलावांमध्ये गतवर्षीपेक्षा १५ ते ६० एमसीएफटीने पाणीसाठा अधिक आहे. त्यामुळे शेतकऱ्यांना मुबलक पाणी उपलब्ध झाले आहे.

तालुक्‍यात नरेवाडी, तेरणी, येणेचवंडी, करंबळी, वैरागवाडी, शेंद्री आणि कुमरी तलाव आहेत. हिरण्यकेशी नदीतील पाण्याचे नियोजन करून उपसाबंदी लागू केली होती. गतवर्षीही चित्री प्रकल्प शंभर टक्के भरला होता. परंतु, पावसाचे पाणी साठवणूक आणि आवर्तनातील सावळ्या गोंधळामुळे अखेरच्या टप्प्यात कमी पडते की काय, अशी अवस्था तयार झाली. 

ऑगस्टमधील अतिवृष्टी आणि त्यानंतर परतीच्या पावसामुळे जमिनीत ओलावा कायम राहिला. यामुळे डिसेंबरपर्यंत पाण्याचा उपसाच झाला नाही. पावसाचे अडवलेले पाणी जानेवारीपर्यंत पुरले. यामुळे २३ जानेवारीला चित्रीतून पहिले आवर्तन सोडले. अजूनही हिरण्यकेशीवरील बंधाऱ्यांमध्ये पाणीसाठा आहे.

हिरण्यकेशी नदीवरील निलजी बंधाऱ्याखाली (लाभक्षेत्राबाहेर) उपसाबंदी कायम आहे. दहा दिवस उपसा आणि २० दिवस बंदी असे रोटेशन आहे. चित्रीच्या पाण्यामुळे खणदाळ, नांगनूरसह इदरगुच्ची, कडलगे आदी गावांना बारमाही पाणी उपलब्ध होत असल्याने समाधान व्यक्त होत आहे.

शेतकऱ्यांचे बैठकांद्वारे पाणी नियोजन

शेतकऱ्यांच्या बैठका घेऊन पाणी नियोजन केले आहे. रात्रीचा उपसा न करण्याच्या सूचना दिल्या आहेत. उपलब्ध साठा जुलैपर्यंत पुरेल या पद्धतीने पाण्याचा वापर करण्याचे आवाहन केले आहे. शेतकऱ्यांना पाण्याची शाश्‍वती मिळाली असल्याने उपसा योग्य वेळी सुरू असल्याचे चित्र आहे. जुलैपर्यंत उपलब्ध पाणी पुरण्यास मदत होणार आहे.