शेतकरी सुकाणू समितीचे २३ मार्चपासून आंदोलन

नंदुरबार : शेतकऱ्यांच्या प्रश्‍नांना वाचा फोडण्यासह त्यांच्या प्रलंबित मागण्यांबाबत सरकारला जाग आणण्यासाठी सहा शेतकरी व शेतमजूर संघटनांच्या राज्य सुकाणू समितीतर्फे २३ मार्च ते ३० एप्रिल या काळात आंदोलन केले जाईल, असा निर्धार मंगळवारी (ता. २०) झालेल्या बैठकीत करण्यात आला.

या बैठकीत शेतकरी संघटनेचे रघुनाथदादा पाटील, बळिराजा संघटनेचे गणेश जगताप, सत्यशोधक शेतकरी सभेचे किशोर ढमाले, अरुण रामराजे, नाना ठाकरे, लोकसंघर्ष मोर्चाचे काथा वसावे, संजय महाजन, रामसिंग गावीत, दिलीप गावित, करणसिंग कोकणी, विलास गावित, सुभाष काकुस्ते आदी उपस्थित होते.

किशोर ढमाले म्हणाले, हमीभाव, आत्महत्याग्रस्त शेतकरी कुटुंबांचे प्रश्‍न व इतर अनेक शेतीप्रश्‍नांबाबत २ फेब्रुवारीला मुख्यमंत्र्यांसोबत बैठक झाली. परंतु ती निष्फळ ठरली. त्यामुळे 'कर, कर्जा नही देंगे'चा नारा दिला जाईल.

रघुनाथदादा म्हणाले, राज्यात १९८६ ते २००० पर्यंत ८६ हजार शेतकऱ्यांनी आत्महत्या केल्या. शेतकऱ्यांचे प्रश्‍न फक्त निवडणुकीत आठवतात. त्यामुळे २३ मार्च रोजी शेतकरी जागर यात्रा निघेल. त्यात विविध भागांत १०० वाहनांमधून फिरून कार्यकर्ते सत्याग्रहींची नोंदणी करतील. तत्पूर्वी १९ मार्चला जिल्हाधिकारी कार्यालयांसमोर अन्नत्याग आंदोलन केले, ३० एप्रिलला शेतकरी जेलभरो आंदोलन होईल. मात्र गरज भासल्यास १ जूनपासून शेतकरी संपाचे हत्यार उपसले जाईल, असेही ते म्हणाले.