पालखेड धरणावर शेतकऱ्यांचा ठिय्या

चिंचखेड, जि. नाशिक : पालखेड धरण समूहातून एक थेंबही पाणी जायकवाडी धरणात जाऊ दिले जाणार नाही, असा इशारा निफाड, दिंडोरी आणि येवला येथील शेतकऱ्यांनी दिला. या तालुक्यातील शेतकऱ्यांनी धरणावर सोमवारी (ता.२९) ठिय्या आंदोलन केले.

शेतकऱ्यांनी धरणाच्या गेटजवळ जाऊन शासनाच्या विरोधात जोरदार घोषणाबाजी केली. ‘‘दिंडोरी तालुक्यातील पालखेड धरण समूहातून ऐन दुष्काळी परिस्थितीत तब्बल ६०० दशलक्ष घनफूट पाणी जायकवाडी प्रकल्पांत सोडण्यासाठी प्रशासन सज्ज झाले आहे. भाजप-शिवसेना सरकारकडे पाण्याबाबत कोणतेही नियोजन नाही. शेतीबाबत सरकारमधील कुणाला काहीही कळत नाही. जायकवाडी धरणात पिण्यासाठी पाणी उपलब्ध असतानाही नाशिकचे पाणी त्यासाठी सोडण्याचा घाट घातला जात आहे. दिंडोरी तालुक्यातील शेतकरी पालखेड कालव्यातच साखळी उपोषणाला बसतील``, असा इशारा या वेळी आमदार नरहरी झिरवाळ यांनी दिला.माजी खासदार समीर भुजबळ म्हणाले, ‘‘नाशिकचे पाणी जायकवाडी धरणात सोडण्याचा प्रकार हा जिल्ह्यातील शेतकऱ्यांवर अन्याय करणारा आहे.``

गोदावरी तापी खोऱ्यातील तूट भरून काढण्यासाठी घाटमाथ्यावरील समुद्रात वाहून जाणारे पाणी अडवावे, अशी मागणी श्रीराम शेटे यांनी केली.यानंतर सोमनाथ मोरे, विठ्ठलराव संधान, भारती पवार, तानाजी पगार, नंदकुमार सोमवंशी आदींनी मनोगत व्यक्‍त केले.

भास्कर भगरे यांनी सूत्रसंचालन केले. या वेळी प्रताप मोरे, सुरेश खोडे, राजेंद्र उफाडे, विलास कड, रघुनाथ पाटील, जनार्दन उगले, रामभाऊ माळोदे, भीमराव मोरे, राजेंद्र निरगुडे, बापूसाहेब वाढवणे, बाळासाहेब बनकर, संजय मोरे, गणेश बनकर, रामकृष्ण खोडे, बापूसाहेब कडाळे, अल्पेश पारख, बाळा बनकर, सुहास मोरे आदी उपस्थित होते.