छावण्या सुरू ठेवण्यासाठी शेवगावात आंदोलन

नगर ः शेगाव तालुक्यातील बहुतांश गावांमध्ये अजूनही पुरेसा पाऊस नाही, त्यामुळे जनावरे जगवण्याची चिंता कायम आहे. त्यासाठी प्रशासनाने जनावरांच्या छावण्या सुरू ठेवाव्यात व जेथे गरज आहे तेथे नव्याने छावणी सुरू करावी. या मागणीसाठी शेवगाव येथे जिल्हा परिषद सदस्य हर्षदा काकडे यांच्या नेतृत्वाखाली आंदोलन करण्यात आले.  

शेवगाव तसेच पाथर्डी तालुक्यांमध्ये यंदाच्या पावसाळ्यात अजूनही पुरेसा पाऊस नाही. त्यामुळे गेल्या वर्षी पडलेला दुष्काळ अजूनही कायम आहे. पुरेसा पाऊस नसल्याने पाणीटंचाई आणि चाऱ्याचा प्रश्न वरचेवर गंभीर होत चालला असून चिंता कायम आहे. गेल्या वर्षी शासनाने दुष्काळात जनावरे जगविण्यासाठी जनावरांच्या छावण्या सुरू केल्या होत्या. त्या छावण्या सुरू ठेवाव्यात, अशी शेतकऱ्यांची मागणी आहे. 

तसेच पिण्याच्या पाण्यासाठी आवश्यक गावात टँकर सुरू ठेवावेत, अशी मागणी तालुक्यातील लोकांची आहे. याच मागणीसाठी गुरुवारी जिल्हा परिषद सदस्य हर्षदा काकडे यांच्या नेतृत्वाखाली शेवगावात आंदोलन करण्यात आले. आंदोलनात गहीनाथ कातकडे, जगन्नाथ गावडे, संजय नागरे, अजय नजन, नवनाथ खेडकर, कृष्णा चौगुले यांच्यासह कार्यकर्ते आणि शेतकरी मोठ्या प्रमाणात सहभागी झाले होते. 

पाथर्डी आणि शेवगाव तालुक्यांत पडलेल्या गंभीर दुष्काळाची शासनाने गांभीर्याने दखल घेऊन चारा छावण्या पाण्याचे टँकर सुरू करावेत, अन्यथा महामोर्चा काढण्याचा इशारा हर्षदा काकडे यांनी दिला आहे. आंदोलनानंतर तहसीलदारांना मागण्यांचे निवेदन देण्यात आले.